इंडिया म्हणजे ‘घमंडिया आघाडी’

पंतप्रधान नरेंद्र मोदींचा घणाघात

| मध्य प्रदेश | वृत्तसंस्था |

जगातील सर्वांत प्राचीन धर्मांपैकी एक असलेल्या सनातन धर्माचा पाया उद्ध्वस्त करण्याचा घमंडिया युतीचा दुष्ट हेतु आहे. या इंडिया आघाडीतील लोकांना स्वामी विवेकानंद आणि लोकमान्य टिळकांना प्रेरित करणारा सनातन धर्म पुसून टाकायचा आहे. त्यांना सनातन धर्म नष्ट करायचा आहे, असा घणाघात पंतप्रधान नरेंद्र मोदी यांनी केला. घमंडिया आघाडीची नुकतीच मुंबईत बैठक झाली. त्यांच्याकडे ना धोरणे आहेत, ना मुद्दे आहेत आणि नाही नेता आहे. सनातन धर्मावर हल्ला करण्याचा त्यांचा छुपा अजेंडा आहे. या धर्माचा त्यांना नाश करायचा आहेफफ, अशीही टीका त्यांनी केली. ते मध्य प्रदेशातील सागर जिल्ह्यातील बीना रिफायनरी पायाभरणी प्रकल्पात बोलत होते.

इंडिया आघाडीने खुलेआम सनातन धर्माला लक्ष्य केले आहे. उद्या ते आमच्यावर हल्ले करतील. देशातील तमाम सनातनी आणि आपल्या देशावर प्रेम करणाऱ्या लोकांनी आता सावध राहावे. आम्हाला अशा लोकांना रोखावे लागेल, असे पंतप्रधान नरेंद्र मोदी म्हणाले. द्रमुकचे नेते उदयनिधी स्टॅलिन यांनी सनातन धर्मावर टीका केली होती. सनातन धर्म नष्ट होणे गरजेचे आहे, असे ते म्हणाले होते. तसेच , कुष्ठरोगासह सनातन धर्माची तुलना केली होती. यावरून मोठा वाद निर्माण झाला होता. या सर्व पार्श्वभूमीवर नरेंद्र मोदींनी उदय निधी यांच्यासह इंडिया आघाडीतील घटकपक्षावर टीका केली आहे.

काँग्रेसने मध्य प्रदेशला पिछाडीवर ठेवले
या राज्यावर अनेक दशके राज्य करणाऱ्या पक्षाने इतर राज्यांच्या तुलनेत आर्थिकदृष्ट्या पिछाडीवर ठेवले. मागील पिढ्यांतील लोकांना आठवत असेल की काँग्रेसने राज्याच्या बुंदेलखंड प्रदेशाला पाणी, विजेची मागणी अर्धवट ठेवली होती. आज भाजपच्या राजवटीत प्रत्येक गावात नवीन रस्ते बांधले गेले आहेत आणि प्रत्येक घरापर्यंत वीज पोहोचवली गेली आहे. मला खात्री आहे की, येत्या काळात मध्य प्रदेश औद्योगिकीकरणाच्या बाबतीत नवीन उंची गाठेल, पंतप्रधान नरेंद्र मोदी म्हणाले.