विश्वचषक गुणतालिकेत भारत दुसऱ्या क्रमांकावर

अफगाणिस्तानचा धुव्वा, पाकिस्तानला फटका

| नवी दिल्ली | वृत्तसंस्था |

रोहित शर्माच्या नेतृत्वातील भारतीय संघाने अफगाणिस्तानचा 8 विकेट आणि 15 षटके राखून धुव्वा उडवला. भारताचा हा विश्वचषकातील सलग दुसरा विजय होय. रोहित शर्मा, विराट कोहली आणि जसप्रीत बुमराह या विजयाचे हिरो ठरले. भारतीय संघाचा हा सलग दुसरा विजय आहे. या विजयामुळे भारतीय संघाने गुणतालिकेत पाकिस्तानला मागे टाकत दुसऱ्या स्थानावर झेप घेतली आहे. भारत, पाकिस्तान आणि न्यूझीलंड संघाने प्रत्येकी दोन दोन सामने जिंकले आहेत. पण न्यूझीलंडची धाव बनविण्यासाची सरासरी चांगली असल्यामुळे ते पहिल्या क्रमांकावर विराजमान आहेत.

भारतीय संघाने पहिल्या सामन्यात ऑस्ट्रेलियाचा पराभव केला होता. त्यानंतर आज झालेल्या सामन्यात अफगाणिस्तानचा धुव्वा उडवला. विराट विजयामुळे भारतीय संघाची धावांची सरासरी सुधारली आहे. भारतीय संघाची सरासरी + 1.5 इतकी झाली आहे. तिसऱ्या क्रमांकावर असणाऱ्या पाकिस्तानची सरासरी 0.9 इतकी आहे. दक्षिण आफ्रिकेचा संघ चौथ्या स्थानावर घसरला आहे. दक्षिण आफ्रिका संघाची धावांची सरासरी + 2 पेक्षा जास्त आहे. पण दक्षिण आफ्रिकेचा फक्त एक सामना झालाय. ते दोन गुणांसह चौथ्या स्थानावर विराजमान आहेत. इंग्लंडचा संघ दोन सामन्यात एक विजय एक पराभवासह पाचव्या क्रमांकावर आहे. बांगलादेशचा संघ सहाव्या स्थानावर विराजमान आहे. बांगलादेश संघालाही एक विजय आणि एक पराभवाचा सामना करावा लागला आहे.

ऑस्ट्रेलिया-श्रीलंकेचे खातेच उघडले नाही

पाच वेळचा विश्वविजेता ऑस्ट्रेलिया आणि एक वेळा चषक उंचावणारा श्रीलंका यांना विजयाचे खाते अद्याप उगडता आले नाही. ऑस्ट्रेलियाचा संघ सातव्या स्थानावर आहे. तर श्रीलंका संघाला आपल्या दोन्ही सामन्यात पराभवाचा सामना करावा लागला. श्रीलंका संघ आठव्या स्तानावर आहे. अफगाणिस्तान नवव्या आणि नेदरलँड दहाव्या स्थानावर आहे. नेदरलँड संघालाही दोन्ही सामन्यात पराभवाचा सामना करावा लागला.

भारताचा मोठा विजय, अफगाणिस्तानचा केला पराभव

रोहित शर्माच्या भारतीय संघानं विश्वचषकाच्या मोहिमेत सलग दुसरा विजय साजरा केला आहे. भारताने दिल्लीतल्या सामन्यात अफगाणिस्तानचा आठ गडी आणि 90 चेंडू राखून धुव्वा उडवला. या सामन्यात अफगाणिस्तानने भारताला विजयासाठी 273 धावांचे तगडे आव्हान दिले होते. पण रोहित शर्माचे खणखणीत शतक आणि त्याने ईशान किशनच्या साथीने दिलेली 156 धावांची दणदणीत सलामी यांच्या जोरावर भारताने अफगाणिस्तानचा आठ गड्यांनी पराभव केला. विराट कोहलीनेही लागोपाठ दुसऱ्या सामन्यात अर्धशतक साजरे केले. त्याने 56 चेंडूत नाबाद 55 धावांची खेळी केली. त्याआधी, अफगाणिस्तानने या सामन्यात 50 षटकात आठ बाद 272 धावांपर्यंत मजल मारली होती. हश्मतुल्लाह शाहिदी आणि आझमतुल्ला ओमरझाईने चौथ्या गड्यासाठी रचलेली 121 धावांची भागीदारी अफगाणिस्तानच्या डावात मोलाची ठरली. कर्णधार शाहिदीने आठ चौकार आणि षटकारासह 80 धावांची खेळी उभारली. ओमरझाईने दोन चौकार आणि चार षटकारांसह 62 धावांची खेळी केली. गोलंदाजीमध्ये भारताच्या जसप्रीत बुमराह याने चार विकेट घेतल्या होत्या. तर हार्दिक पांड्याने दोन विकेट घेतल्या.