भारतीय हवाई दलाचे लढाऊ विमान कोसळले; दोन्ही वैमानिक शहीद

। आसाम । वृत्तसंस्था ।

भारतीय हवाई दलाचे अत्याधुनिक सुखोई एसयू-30 एमकेआय लढाऊ विमान कोसळून त्यातील दोन्ही वैमानिक शहीद झाल्याची दुर्दैवी घटना घडली आहे. शुक्रवारी सकाळी भारतीय हवाई दलाच्या प्रवक्त्यांनी या अपघाताची अधिकृत पुष्टी केली. हे विमान आसाममधील जोरहाटपासून सुमारे 60 किलोमीटर अंतरावर असलेल्या कार्बी आंगलोंग जिल्ह्यात कोसळले. या अपघातातील दोन्ही वैमानिक, स्क्वॉड्रन लीडर अनुज आणि फ्लाइट लेफ्टनंट महाराष्ट्राचे सुपूत्र पूर्वेश दुरगकर यांना वीरमरण आले. पूर्वेश दुरगकर भंडारा जिल्ह्यातील आहेत. तीन वर्षांपूर्वीचे ते पास आऊट झाले होते.

मिळालेल्या माहितीनुसार, गुरुवारी संध्याकाळी हे सुखोई एसयू-30 एमकेआय लढाऊ विमान नियमित प्रशिक्षणासाठी जोरहाट येथील हवाई दल तळावरून उड्डाण केले होते. उड्डाणानंतर काही वेळातच विमानाचा जमिनीवरील नियंत्रणाशी संपर्क तुटला. त्यामुळे हवाई दलात चिंतेचे वातावरण निर्माण झाले. विमानाशी शेवटचा संपर्क संध्याकाळी 7.42 वाजता झाला होता. त्यानंतर ते रडारवरून गायब झाले. विमानाचा संपर्क तुटताच हवाई दलाने तातडीने शोध आणि बचाव पथके घटनास्थळी रवाना केली. संरक्षण अधिकाऱ्यांच्या माहितीनुसार, हे विमान जोरहाटपासून सुमारे 60 किलोमीटर अंतरावर असलेल्या कार्बी आंगलोंग जिल्ह्यातील जंगली भागात कोसळले. स्थानिक लोकांनी त्या परिसरात मोठा स्फोट झाल्याचा आवाज ऐकल्याचे सांगितले आहे. मात्र, अपघाताचे नेमके कारण अद्याप स्पष्ट झाले नसून याबाबत सखोल तपास सुरू आहे.

Su-30MKI हे भारतीय हवाई दलाच्या सर्वात सक्षम आणि प्रगत लढाऊ विमानांपैकी एक मानले जाते. रशियाच्या सुखोई कंपनीने विकसित केलेले हे दोन आसनी मल्टीरोल जेट भारतात हिंदुस्तान एरोनॉटिक्स लिमिटेड च्या परवान्याअंतर्गत तयार केले जाते. लांब पल्ल्याच्या मोहिमा, प्रगत शस्त्रास्त्रे आणि क्षेपणास्त्रे वाहून नेण्याची क्षमता यामुळे हे विमान भारतीय वायुसेनेच्या लढाऊ ताफ्याचा कणा मानले जाते. दरम्यान, या अपघाताचे नेमके कारण शोधण्यासाठी भारतीय हवाई दलाने तपास सुरू केला असून तांत्रिक बिघाड किंवा इतर कारणांची चौकशी केली जात आहे.