रायगडात गुटख्याच्या छुप्या विक्रीला पोलिसांचाच वरदहस्त?

जिल्ह्यामध्ये चढत्या दराने विक्रीचा सुळसुळाट

| अलिबाग | प्रमोद जाधव |

रायगड जिल्ह्यात गुटखा बंदी फक्त कागदावरच असल्याचे चित्र समोर आले आहे. जिल्ह्यात पान टपरीपासून किराणा दुकानात चढत्या दराने गुटखा विकला जात आहे. छुप्या पद्धतीने गुटखा विक्री होत असतानादेखील रायगड पोलिसांकडून बघ्याची भूमिका घेण्यात येत असल्याचे बोलले जात आहे. त्यामुळे या छुप्या गुटखा विक्रीला नक्की कोणाचा वरदहस्त आहे, असा सवाल जनमानसातून उमटत आहे. त्यामुळे रायगडच्या पोलीस अधीक्षक याबाबत काय भूमिका घेणार याकडे लक्ष लागून राहिले आहे.

जिल्ह्यामध्ये गुटखा, तंबाखू व अंमली पदार्थाची वाहतूक, विक्री व निर्मितीच्या धंद्यांचा सुळसुळाट होता. स्थानिक पोलिसांनादेखील अवैध धंदेवाले महत्त्व देत नव्हते. कारवाई करणाऱ्या पोलिसांवर कायमच दबाव राहिला होता. त्यामुळे अवैध धंदे जिल्ह्यात राजरोसपणे सुरु होते. पुण्यातील राज्य राखीव पोलीस दलाच्या समादेशक म्हणून काम पाहणाऱ्या आंचल दलाल यांची रायगडच्या पोलीस अधीक्षक म्हणून बदली करण्यात आली. मे महिन्याच्या शेवटच्या आठवड्यात त्यांनी जिल्ह्याच्या सुरक्षेचा आणि कायदा सुव्यवस्थेचा पोलीस अधीक्षक म्हणून कारभार हाती घेतला. पदभार स्वीकारल्यानंतर त्यांनी जिल्ह्यातील मटका, जुगार, गुटखा, अंमली पदार्थ विक्री, वाहतूक, निर्मिती करणाऱ्यांना दणका देण्यास सुरुवात केली. अवैध धंदे चालविणाऱ्या माफियांसोबत आर्थिक हितसंबंध जपणाऱ्या पोलीस अधिकाऱ्यांसह कर्मचाऱ्यांच्या बदल्या करण्यात आल्या, अशी चर्चा आहे.

गुटखा, मटका, जुगार क्लब चालविण्यावर बंदी घातली. स्थानिक पोलीस ठाण्यातील पोलीस अधिकाऱ्यांना सूचना देत कारवाई करण्याचे आदेश दिले. त्यांच्या आदेशानुसार जिल्ह्यात कारवाई करण्यात आली. अंमली पदार्थांची तस्करी करण्यापासून मटका, गुटखा विक्रीचा धंदा चालविणाऱ्यांवर गुन्हे दाखल करण्यात आले. त्यामुळे जिल्ह्यातील नागरिकांनी कारवाईबाबत समाधान व्यक्त केले. परंतु, पोलिसांची कारवाई फक्त दिखावाच असल्याची चर्चा सध्या जोरात सुरू आहे. पान टपरीपासून ठिकठिकाणी छुप्या पद्धतीने चढत्या दराने गुटखा विकला जात आहे. 15 ते 20 रुपयांना मिळणारा गुटखा 35 ते 40 रुपयांना विकला जात आहे. त्यामुळे हा धंदा जिल्ह्यात तेजीत सुरु असल्याचे चित्र आहे. मात्र, या गुटख्याची वाहतूक कोणाच्या कृपेने होते, हा प्रश्न उपस्थित केला जात आहे. जिल्ह्यामध्ये गुटखा विक्री, वाहतुकीवर बंदी असतानाही छुप्या पद्धतीने हा धंदा चालविला जात आहे. त्यामुळे पोलिसांच्या कारवाईबाबत प्रश्न उपस्थित केला जात आहे. या अवैध धंद्याबाबत रायगडच्या पोलीस अधीक्षक आंचल दलाल काय भूमिका घेणार, याकडे लक्ष लागून राहिले आहे.

अलिबाग बसस्थानक जुगाराचा अड्डा
अलिबाग पोलीस ठाण्यापासून हाकेच्या अंतरावर अलिबाग एसटी बसस्थानक आहे. या स्थानकात भरदिवसा मटका जुगार चालविला जात आहे. स्थानकात वेगवेगळ्या ठिकाणी छुप्या पद्धतीने बसून चिठ्ठी दाखवून मटका जुगार खेळला जात आहे. त्यामुळे प्रवासी कमी आणि मटका जुगार चालविणारे जास्त, अशी परिस्थिती अलिबाग स्थानकात निर्माण झाली आहे. अलिबाग स्थानक मटक जुगाराचा अड्डा बनत चालला असल्याचे बोलले जात आहे. तसेच शहरातील कचराभूमीच्या परिसरातदेखील दुपारच्या वेळेला मटका जुगार चालविला जात असल्याची माहिती समोर येत आहे. त्यामुळे अलिबाग पोलीस करतात काय, असा प्रश्न उपस्थित केला जात आहे.

पोलीस अधीक्षक आचल दलाल यांनी कारभार हाती घेताच, अवैध धंदेवाल्यांना धडकी भरवणारी धडक कारवाई सुरू केल्याने त्यांचे धाबे दणाणले आहेत. परंतु, पोलीस दलातील काही अधिकाऱ्यांचा अवैध धंदेवाल्यांशी अर्थपूर्ण संबंध असल्याची चर्चा असून, त्यामुळे कारवाईस टाळाटाळ होत असून, चोरी छुपे मटका, जुगार जोरात सुरू असल्याचे बोलले जात आहे. अर्थपूर्ण संबंध जपणारे ते अधिकारी कोण, असा सवाल विचारला जात आहे.

अलिबाग हद्दीतील गुटखा, अंमली पदार्थ विक्री, वाहतुकीवर कारवाई करण्यात आली आहे. वेगवेगळ्या टपऱ्यांवर छापे टाकण्यात आले आहेत. छुप्या पद्धतीने गुटखा व अन्य धंदे चालत असतील, तर माहिती घेऊन त्यांच्याविरोधात कारवा केली जाईल.

किशोर साळे,
पोलीस निरीक्षक, अलिबाग