बहिणीच्या पैशावर भावांचा डल्ला

12 हजार भावांनी घेतला लाडकी बहीण योजनेचा लाभ

| मुंबई | प्रतिनिधी |

मुख्यमंत्री लाडकी बहीण योजनेतील आणखी एक घोटाळा समोर आला आहे. फक्त महिलांसाठी सुरू केलेल्या या योजनेत तब्बल 12 हजार 431 पुरुषांनी चुकीच्या पद्धतीने लाभ घेतल्याचं उघड झाले. लाडकी बहीण योजनेतून दर महिन्याला 1500 रूपये आर्थिक सहाय्य केले जाते. आरटीआयच्या माहितीनुसार, लाडकी बहीण योजनेतील लाभार्थ्यांची पडताळणी सुरू आहे त्यात 12 हजारांहून अधिक पुरुषांनी या योजनेचा लाभ घेतल्याचं समोर आले.

याबाबत महिला बालविकास विभागाच्या अधिकाऱ्यांनी पुष्टी केली. तपासानंतर या लाभार्थ्यांची नावे यादीतून वगळण्यात आली. त्याचसोबत 77 हजार 980 महिलांनाही अपात्र ठरवण्यात आले ज्यांनी चुकीच्या पद्धतीने या योजनेचा लाभ घेतला होता. सरकारला 164 कोटींचा चुना या 12 हजार पुरुषांनी 13 महिने या योजनेचा लाभ घेतला. या पुरुषांनी दर महिना 1500 रूपये घेतले तर 77 हजार अपात्र महिलांना 12 महिन्यापर्यंत ही रक्कम मिळाली. त्यामुळे सरकारचे एकूण 164.52 कोटी रूपये रक्कम चुकीच्या खात्यात वर्ग झाली. ज्यातून 25 कोटी पुरुषांनी तर 140 कोटी अपात्र महिलांनी लाभ घेतला.

2024 च्या विधानसभा निवडणुकीच्या 4 महिने आधी ही योजना सुरू करण्यात आली होती. ऑगस्ट 2024 मध्ये लाडकी बहीण योजना प्रचार आणि प्रसार करण्यासाठी 200 कोटी बजेट घोषित केले होते. विरोधकांनी या योजनेवरून तत्कालीन सत्ताधाऱ्यांवर टीकास्त्र सोडले होते. सध्याच्या घडीला 2.41 कोटी महिला या योजनेचा लाभ घेत आहेत. ज्यातून सरकारी तिजोरीवर 3400 कोटींचा आर्थिक भार पडत आहे. या योजनेतील निकषांना डावलून 2400 सरकारी कर्मचाऱ्यांनी योजनेचा चुकीचा लाभ घेतला. ज्यात पुरुषही सहभागी आहेत. सरकारने अद्याप अपात्र लाभार्थ्यांकडून कुठलीही वसुली केली नाही, ना त्यांच्यावर दंडात्मक कारवाई केली आहे. सुरुवातीच्या तपासात 26 लाख लाभार्थी महिला अपात्र ठरल्या. आतापर्यंत 26.34 लाख संशयित खाते योजनेच्या यादीतून वगळण्यात आले आहेत. जसजसं पडताळणी होत जाईल, तसं हा आकडा वाढण्याची शक्यता आहे, असं अधिकाऱ्यांनी सांगितले.

पुरुष लाभार्थ्यांनी जुलै 2024 ते जुलै 2025 या काळात लाडकी बहीण योजनेचे पैसे घेतले. जुलै 2025 नंतर ही रक्कम बंद करण्यात आली. परंतु, या पुरुष लाभार्थ्यांकडून सरकारने वसुली केली नाही. ज्या कुटुंबाचं वार्षिक उत्पन्न 2.50 लाखांहून अधिक होते किंवा एका कुटुंबात दोन किंवा त्याहून अधिक सदस्यांनी योजनेचा लाभ घेतला, अशा 77 हजार महिलांना योजनेतून अपात्र ठरवण्यात आले. लाडकी बहीण योजनेतील घोटाळा रोखण्यासाठी राज्यव्यापी ई-केवायसी मोहीम सुरू केली आहे. सर्व लाभार्थ्यांना ई-केवायसी बंधनकारक असल्याने आणखी प्रकार समोर येण्याची शक्यता आहे.