अनावश्यक मतदारांची नावे वगळणे गरजेचे

माथेरानमधील धूर्त नेत्यांचा वरदहस्त

। माथेरान । वार्ताहर ।

माथेरानमधील सध्याच्या परिस्थितीत सर्व प्रभाग मिळून जेमतेम 3 हजार 900 इतकी मतदार संख्या आहे. यातील बहुतांश मतदार हे याठिकाणी वास्तव्यास नसून त्यांचे रेशनकार्ड तसेच स्वतःच्या घराचा पुरावा देखील नाही. तर, काही मतदार हे येथे नोकरी-व्यवसायानिमित्ताने आले होते. फक्त माथेरान नगरपरिषदेच्या निवडणूक काळात प्रत्येक मताला पाच ते 10 हजार रुपये आणि वेळप्रसंगी त्याहूनही अधिक रक्कम मिळत असल्यामुळे अशी मंडळी केवळ पाच वर्षातून एकदाच आपले दर्शन देत असतात. यामुळे अशा मतदारांची नावे सर्वपक्षीयांनी मिळून कमी करण्याची गरज असल्याची चर्चा येथे रंगू लागली आहे.

माथेरानमध्ये जे लोक बाहेरून व्यवसाय करण्यासाठी आलेले आहेत, त्यातील बहुतांश मतदारांचे नाव अन्य मतदार केंद्रावर देखील आहेत. अशी बरीच नावे राजकीय पक्षांच्या धूर्त नेत्यांनी मतदार यादीत समाविष्ट केलेली आहेत. यामुळे या अनाठायी मतदारांमुळे एखाद्या धनाढ्य उमेदवारालाच याचा लाभ होत असतो. यासाठी येथील सर्वपक्षीय नेत्यांनी अशी नावे मतदार यादीमधून वगळल्यास काहीशा प्रमाणात आर्थिक बचत आणि सर्वांना फायदेशीर ठरू शकते. माथेरान बाहेर वास्तव्यास असणार्‍या मतदारांना लोकसभा, विधानसभेच्या निवडणुकीच्या काळात त्यांना समाधानकारक मोबदला मिळत नसल्यामुळे हे मतदार इकडे फिरकत देखील नाहीत. परंतु, जेव्हा पतसंस्था अथवा नगरपरिषदेच्या निवडणूक काळात येथील सर्वपक्षीय मंडळी चार ते पाच वेळा बाहेरील मतदारांना गोंजारण्यासाठी पायपीट करताना दिसत असतात. यामुळे या विधानसभेच्या निवडणुकीत 3 हजार 900 पैकी जेमतेम 3 हजारच्या आसपास मतदान होण्याची शक्यता आहे.
यातच निवडणूकीसाठी आलेल्या निधीचा वापर फक्त मद्यपीसाठी खर्च केला गेला अथवा जवळच्या लोकांना जे पक्षाचे सदस्य किंवा कार्यकर्ते देखील नाहीत अशांना वाटप केले जाते. यामुळे अन्य निष्ठावंत कार्यकर्ता नाराजी व्यक्त करणार यात शंका नाही. याचाच फटका येथील निर्णायक मतांमुळे विधानसभेच्या उमेदवाराला सहन करावा लागणार आहे. यासाठी ज्या पक्षाचे उमेदवार आहेत त्यांनी आपल्या विश्‍वासु, निष्ठावंत सदस्यांकडून निवडणूक निधीचे वाटप करण्यात यावेत, असे स्थानिक मतदार बोलत आहेत.