आयटीबीपी जवानांची बस सिंधू नदीत कोसळली

| जम्मू | वृत्तसंस्था |

जम्मू-काश्मीरच्या गंदरबल जिल्ह्यात बुधवारी (दि.30) एक धक्कादायक दुर्घटना घडली. इंडो-तिबेटन बॉर्डर पोलीस (आयटीबीपी) जवानांना घेऊन जाणारी एक बस कुल्लान येथील पूलावरून सिंधू नदीत कोसळली. ही घटना मुसळधार पावसामुळे घडली. ज्यामुळे बचावकार्यात अडथळे येत आहेत.

अधिकाऱ्यांनी दिलेल्या माहितीनुसार, बसमधील सर्व जवानांची सुटका करण्यात यश आले आहे. परंतु, चालक जखमी झाला असून त्याला रुग्णालयात दाखल करण्यात आले आहे. पीटीआयच्या अहवालानुसार, बसमधील सर्व जवानांना सुरक्षितपणे बाहेर काढण्यात आले आहे. मात्र, बसमध्ये किती जवान होते? याबाबत तात्काळ माहिती उपलब्ध झालेली नाही. चालक गंभीर जखमी असल्याचे सांगितले जात आहे. त्याच्यावर उपचार सुरू आहेत. दुर्घटनेचे नेमके कारण अद्याप स्पष्ट झालेले नाही, परंतु मुसळधार पावसामुळे रस्ता निसरडा झाला असावा, असा प्राथमिक अंदाज आहे.

बचावकार्य आणि शस्त्रांचा शोध 
दुर्घटनेनंतर गंदरबल येथील स्टेट डिझास्टर रिस्पॉन्स फोर्स (एसडीआरएफ) आणि एसडीआरएफ सब-कम्पोनेंट गुंड यांनी संयुक्त बचावकार्य सुरू केले आहे. दुर्घटनेत बसमधील काही शस्त्रे नदीत वाहून गेल्याची माहिती आहे. आतापर्यंत तीन शस्त्रे सापडली असून, उर्वरित शस्त्रांचा शोध सुरू आहे. बचावकार्याला मुसळधार पाऊस आणि नदीचा वेगवान प्रवाह यामुळे आव्हानांचा सामना करावा लागत आहे. स्थानिक प्रशासनाने या दुर्घटनेची गंभीर दखल घेतली आहे. अधिकाऱ्यांनी सांगितले की, बचावकार्य पूर्ण होईपर्यंत सर्वतोपरी प्रयत्न केले जातील. दुर्घटनेच्या कारणांचा तपास सुरू आहे, आणि याबाबत लवकरच अधिकृत निवेदन जारी केले जाईल.