बीसीसीआयच्या नियमांची काव्या मारनकडून पायमल्ली

| मुंबई | प्रतिनिधी |

सनरायजर्स हैदराबादची मालकीण काव्या मारनने बीसीसीआयचा नियम पायदळी तुडवत पाकिस्तानी खेळाडूला टीममध्ये घेतले आहे. काव्या मारनने लिलावामध्ये पाकिस्तानी खेळाडूवर बोली लावली आणि त्याला टीममध्ये घेतले. भारतीय संघाचे मालक पाकिस्तानी खेळाडूंना संघामध्ये घेणार नाहीत, या अलिखित नियमांचे काव्या मारनकडून उल्लंघन केले गेल्याची चर्चा सुरू झाली आहे.

इंग्लंडची स्पर्धा असलेल्या द हंड्रेडमध्ये काव्या मारनच्या मालकीची संघ आहे. या टीमने पाकिस्तानचा स्पिनर अबरार अहमदला संघामध्ये घेतले आहे. द हंड्रेडच्या लिलावामध्ये अबरार अहमदसाठी दीर्घ बोली लागली, ज्यात काव्या मारनने त्याच्यासाठी तब्बल 1,90,000 पाऊंड (अंदाजे 2.64 कोटी रुपये) देऊन अबरार अहमदला संघामध्ये घेतलं. 27 वर्षीय अबरार अहमदने पाकिस्तानसाठी 10 टेस्ट, 15 वनडे आणि 38 टी-20 मॅच खेळल्या आहेत.

अबरार अहमद हा 2026 च्या टी-20 वर्ल्ड कपमध्ये पाकिस्तानच्या टीमचा भाग होता. श्रीलंकेविरुद्धच्या सुपर-8 च्या शेवटच्या सामन्यात अबरारने उत्कृष्ट कामगिरी केली होती. अबरारने 23 रन देऊन 3 विकेट घेतल्या होत्या. अबरार अहमदची द हंड्रेडमध्ये खेळण्याची ही पहिलीच वेळ आहे. याआधी अबरार अहमद पाकिस्तान सुपर लीग, बांगलादेश प्रीमियर लीग आणि मेजर लीग क्रिकेटमध्ये खेळला आहे. काव्याने अबरारची टीममध्ये निवड केली असली तरी पीसीबीकडून मंजुरी मिळाली तरच अबरार द हंड्रेडमध्ये खेळू शकणार आहे. द हंड्रेडमधली सनरायझर्स लीड्स ही टीम पूर्णपणे भारतीय मीडिया समूह सन ग्रुपच्या मालकीची आहे, ज्याचे नेतृत्व कलानिथी मारन आणि त्यांची मुलगी, सीईओ काव्या मारन करतात. फ्रँचायझीला पूर्वी नॉर्दर्न सुपरचार्जर्स म्हटले जात होते, पण आता या टीमला सनरायजर्सने विकत घेतले.