खोपटा येथील पूल धोकादायक

सळ्या बाहेर पडल्याने अपघाताचा धोका

| चिरनेर | प्रतिनिधी |

खोपटे पुलावर पडलेल्या खड्ड्यांमुळे सदर पूल रहदारीसाठी धोकादायक बनला असून, लोडबेरिंगने जोडलेल्या या पुलाच्या लोखंडी सळ्या निखळल्याने अपघाताचा धोकाही वाढला आहे. या पुलावरून सध्या मोठ्या प्रमाणात जड कंटेनर वाहनांची वाहतूक होत आहे. या डळमळीत झालेल्या रहदारीच्या पुलामुळे अपघाताचा धोका वाढला आहे. या पुलावर अनेक अपघातही झाले आहेत. यामुळे संतप्त नागरिकांनी तसेच स्थानिक लोकप्रतिनिधींनी समाज माध्यमातून तीव्र नाराजी व्यक्त केली असून, या खोपटे पुलाची लवकरात लवकर दुरुस्ती न केल्यास तीव्र आंदोलनाचा इशारा दिला आहे.

दरम्यान सहा महिन्यापूर्वी खोपटे पुलाच्या दुरुस्तीची निविदा जाहीर करण्यात आली आहे. पुलाच्या दुरुस्तीसाठी आधुनिक पद्धतीने पुलाचे मजबुतीकरण करण्यात येणार आहे. मात्र, आजपर्यंत या दुरुस्तीच्या कामाला सुरुवात झालेली नाही. त्यामुळे या पुलाचे काम कधी सुरू होणार असा सवाल येथील प्रवासी व नागरिकांकडून व्यक्त केला जात आहे. या वाढत्या पुलावरील खड्ड्यांमुळे अवजड वाहनांचा अपघात होण्याची शक्यता वाढली आहे. सार्वजनिक बांधकाम विभागाने जुन्या खोपटे पुलाच्या मजबुतीकरणासाठी पाच कोटी रुपयांच्या खर्चाचा आराखडा तयार केला आहे. मात्र, गेल्या सहा महिन्यांपासून प्रत्यक्षात कामाला सुरुवात केलेली नाही. दुचाकीवरून जाणाऱ्या प्रवाशांबाबत अपघाताच्या घटना वारंवार घडत असल्याची माहिती खोपटे येथील सामाजिक कार्यकर्ते गोरख ठाकूर, प्रशांत ठाकूर यांनी दिली. तर वेळ पडल्यास आंदोलन करू, असाही इशारा त्यांनी दिला आहे.

सार्वजनिक बांधकाम विभागाच्या अखत्यारित मोडणाऱ्या या पुलाची देखभाल, दुरुस्तीची जबाबदारी त्यांच्यावर आहे. मात्र, सार्वजनिक विभाग याकडे कानाडोळा करत आहे. त्यामुळे अवजड वाहनांबरोबर प्रवासी वाहनानादेखील धोका निर्माण झाला आहे. खोपटे पूल ते कोप्रोली हा मार्गही धोकादायक झाला आहे. याचा फटका येथील प्रवाशांना बसत आहे. त्यामुळे खोपटा पूल आणि मार्गाची लवकरात लवकर दुरुस्ती करा, अशी मागणी प्रवाशांकडून केली जात आहे.

जुना खोपटा पूल धोकादायक नाही. या पुलाची तपासणी करण्यात आली आहे. तर पुलाच्या दुरुस्ती आणि मजबुती करणासाठी निविदा मंजूर करण्यात आली असून, या कामाला सुरुवात होणार आहे. त्यानुसार या पुलाचे मजबुतीकरण करण्यात येणार आहे. तसेच पुलावरील वारंवार उखडत असलेल्या थरांवर उपाय म्हणून नव्या तंत्रज्ञानाचा वापर करून थर टाकण्यात येणार आहेत.

– नरेश पवार, अतिरिक्त अभियंता, सार्वजनिक बांधकाम विभाग, उरण