धारदार चाकूने एकाचा खून

| माणगाव | प्रतिनिधी |

माणगाव शहरातील मुंबई-गोवा महामार्गालगत रेल्वे स्टेशनच्या जवळ असलेल्या अनमोल आईस्क्रीम कॉर्नर दुकानाजवळ दोन अनोळखी इसमांनी चाकूचे वार करून अनोळखी इसमाचा खून केल्याची घटना घडली आहे.

पोलीस सूत्रांकडून मिळालेल्या माहितीनुसार, सविस्तर वृत्त असे की, दि. 11 सप्टेंबर रोजी अनोळखी मयत व अनोळखी दोन आरोपी इसम यांच्यात अनमोल आईस्क्रीम कॉर्नर दुकानासमोर ओट्यावर त्यांच्यामध्ये वाद होऊन त्याचे रूपांतर मारामारीमध्ये झाले. त्यावेळी आरोपी क्र. 1 याने मयत यास कानाखाली मारली. त्यावरुन यातील मयताने त्याच्या खिशातून चाकुसारखे धारदार शस्त्र काढून आरोपी क्र. 1 यावर हल्ला करुन वार केले. त्यावेळी आरोपी क्र. 2 यांनी मयतास आवरण्याचा प्रयत्न करत असताना त्याच्या छातीवर, पोटावर दुखापती झाल्या. तसेच मयताने स्वतःच्या डाव्या हाताच्या मनगटावर दुखापती केल्या. तसेच कोणत्याही औषधोपचाराची मदत न देता चाकुसारखे धारदार शस्त्र, ते शस्त्र पुसलेला कपडा, इतर साहित्य असे घटनास्थळावरुन नेऊन पुरावा नष्ट केला. या घटनेची नोंद माणगाव पोलीस ठाण्यात करण्यात आली असून, पुढील तपास उपविभागीय पोलीस अधिकारी पुष्कराज सूर्यवंशी यांच्या मार्गदर्शनाखाली पोलीस निरीक्षक निवृत्ती बोर्‍हाडे करीत आहेत.