कृषी महोत्सवात लाल भेंडीने खाल्ला भाव

जिल्हाधिकाऱ्यांनी केले कौतुक

| नेरळ | प्रतिनिधी |

रायगड जिल्हास्तरीय कृषी महोत्सवामध्ये कर्जत तालुक्यातील शेतकऱ्याने पिकवलेली लाल भेंडी सर्वांचा चर्चेचा विषय ठरली. जिल्ह्यातील लाल रंगाच्या भेंडीचे पहिले उत्पादन कर्जत तालुक्यात घेण्यात आले असून, कृषी प्रदर्शनात लाल रंगाची भेंडी ठेवण्यात आली होती.

राष्ट्रीय कृषी विकास योजना महाराष्ट्र पौष्टिक तृणधान्य अंतर्गत जिल्हास्तरीय कार्यशाळा आणि जिल्हास्तरीय कृषी महोत्सव अलिबाग येथे मेघा चित्रमंदिर या ठिकाणी कृषी प्रदर्शनाचे आयोजन करण्यात आलेले होते. जिल्हाधिकारी रायगड किशन जावळे यांच्या हस्ते उद्घाटन झालेल्या कृषी प्रदर्शनात रायगड जिल्ह्यातील शेतकऱ्यांनी प्रगत शेती करून केलेली उत्पादने प्रदर्शनात ठेवण्यात आली होती. कर्जत तालुक्यातील आरडे येथील प्रगतीशील शेतकरी नवनाथ शेळके यांनी त्यांच्या शेतात नावीन्यपूर्ण बाब म्हणून लाल भेंडीचे उत्त्पन्न घेण्यात आलेले होते. प्रदर्शनात पाहणी करताना जिल्हाधिकारी किशन जावळे यांनी आरोग्यकारक लाल रंगाची भेंडीच्या उत्पादनाचे कौतुक केले. रायगड जिल्ह्यात प्रथमच असा प्रयोग कृषी विभागाच्या माध्यमातून घेण्यात आल्याने लाल भेंडीबाबत जिल्हाधिकारी जावळे यांनी शेळके यांच्या उपक्रमाचे कौतुक केले. या प्रदर्शनामध्ये जिल्ह्यातील इतर शेतकऱ्यांनीदेखील लाल भेंडीची लागवडीबद्दल नवनाथ शेळके यांच्याशी चर्चा केली तसेच लाल रंगाची भेंडीचे आहारातील महत्त्वाबाबत विचारपूस केली.

नवनाथ शेळके यांना जिल्हा अधीक्षक कृषी अधिकारी उज्वला बाणखेले, उपविभागीय कृषी अधिकारी खोपोली नितीन फुलसुंदर, तालुका कृषी अधिकारी अशोक गायकवाड, मंडळ कृषी अधिकारी कर्जत दिनेश कोळी, कृषी पर्यवेक्षक सचिन केणे, कृषी सहाय्यक विजय गंगावणे यांनी लाल भेंडीचे उत्पादन घेण्याबाबत उल्लेखनीय कामगिरी पार पाडलेली आहे.