इंडक्शन प्रशिक्षण कार्यक्रमाचा शुभारंभ

प्रमुख बंदरांतील अधिकाऱ्यांची उपस्थिती

| उरण | प्रतिनिधी |

भारतातील सर्वात मोठे कंटेनर बंदर असलेल्या जवाहरलाल नेहरू बंदर प्राधिकरणाने (जेएनपीए) इंडियन पोर्ट असो.च्या सहकार्याने इंडक्शन प्रशिक्षण कार्यक्रम सुरु केला आहे. या प्रशिक्षण कार्यक्रमात देशातील सर्व प्रमुख बंदरांमधून आलेले अधिकारी गुरूवारी (दि.18)उपस्थित राहिले. हा उपक्रम भारतीय बंदर क्षेत्रातील क्षमता बांधणी आणि प्रसार करण्यासाठी उत्कृष्टता केंद्र म्हणून जेएनपीएची वाढती भूमिका प्रतिबिंबित करत आहे.

या कार्यक्रमाचे उद्घाटन बंदरे, जहाज वाहतूक व जलमार्ग मंत्रालयाचे सचिव टी के. रामचंद्रन (भा.प्र.से.) यांच्या हस्ते झाले. यावेळी मंत्रालयाचे संयुक्त सचिव (पीएचआरडी) संदीप गुप्ता, आयपीएचे व्यवस्थापकीय संचालक विकास नरवाल, तसेच जेएनपीएचे अध्यक्ष, व्हीपीपीएलचे अध्यक्ष व व्यवस्थापकीय संचालक उन्मेष वाघ (भा.रा.से.) यांची उपस्थिती होती.

हा प्रशिक्षण कार्यक्रम अधिकाऱ्यांना बंदर संचालन, प्रशासन, नियामक चौकट आणि भविष्यासाठी तयार असलेल्या समुद्री पद्धतींची ओळख करून देण्यासाठी रचण्यात आला होता. यामध्ये जेएनपीए विभागप्रमुख आणि उद्योगतज्ज्ञांच्या मार्गदर्शनाखाली सत्रे, संवादात्मक कार्यशाळा आणि बंदर व्यवस्थापनाच्या महत्वाच्या पैलूंवरील प्रत्यक्ष अनुभव यांचा समावेश आहे. या दोन आठवड्यांच्या प्रशिक्षण सत्रात साइट व्हिजिट, पॅनेल चर्चा आणि केस स्टडीचा समावेश आहे, ज्यामुळे शिक्षण मनोरंजक आणि रोचक होणार आहे.

सागरी क्षेत्र आर्थिक विकासाच्या केंद्रस्थानी
बंदरे, जहाज वाहतूक आणि जलमार्ग मंत्रालयाच्या दृष्टिकोनावर प्रकाश टाकताना मंत्रालयाचे सचिव टी.के. रामचंद्रन म्हणाले की, सागरी क्षेत्र हे आपल्या देशाच्या आर्थिक विकासाच्या केंद्रस्थानी आहे आणि भविष्यातील अधिकारी म्हणून तुमची भूमिका त्याच्या मार्गाला आकार देण्यात महत्त्वाची असेल. शिकण्याचा आणि सहकार्याचा हा प्रवास सुरू केल्याबद्दल मी तुम्हा प्रत्येकाचे अभिनंदन करतो. या कार्यक्रमाचे आयोजन केल्याबद्दल, ज्ञानाची देवाणघेवाण, कौशल्य विकास आणि आंतर-बंदर सहकार्यासाठी व्यासपीठ तयार करण्याच्या सततच्या या प्रयत्नांबद्दल मी जेएनपीएचे कौतुक करतो. यासारख्या उपक्रमांमुळे भारताच्या बंदरांमध्ये नावीन्यपूर्ण, कार्यक्षम, जागतिक स्पर्धात्मकतेला चालना देऊ शकणारा आणि उज्वल भविष्यासाठी सज्ज असा सागरी कर्मचारी वर्ग निर्माण करण्याचा मंत्रालयाचा दृष्टीकोन प्रतिबिंबित होतो, असे त्यांनी सांगितले.

जेएनपीएमध्ये कुशल मानवी भांडवल विकसित करणे हे आधुनिक बंदर पायाभूत सुविधांच्या उभारणीइतकेच महत्त्वाचे आहे. इंडक्शन प्रशिक्षण कार्यक्रमासाठी अधिकाऱ्यांच्या पहिल्या तुकडीचे आयोजन ही ज्ञानाच्या प्रसार करण्यासाठी आमची वचनबद्धता अधोरेखित करते. मला आशा आहे की, या अभ्यासक्रमाच्या अखेरीस सहभागींना एक ज्ञानवर्धक अनुभव मिळेल.

उन्मेष वाघ,
जेएनपीए अध्यक्ष तथा व्हीपीपीएलचे अध्यक्ष आणि व्यवस्थापकीय संचालक