दारू विक्रेत्याची दगडाने ठेचून हत्या

। नागपूर । प्रतिनिधी ।

दगडाने ठेचून एका दारू विक्रेत्याची हत्या केल्याची धक्कादायक घटना नागपूरमध्ये घडली आहे. ही हत्या बुधवारी खडगाव मार्गावर करण्यात आली. याप्रकरणातील आरोपीला वाडीतील गुन्हे अन्वेषन पथकाने अटक केली असून अधिक तपास चालू आहे.

खडगाव मार्गावर बुधवारी (दि. 16) दुपारी चारच्या सुमारास मृतदेह असल्याची माहिती नियंत्रण कक्षाला मिळाली. माहितीनुसार पोलीस तात्काळ घटनास्थळी दाखल होऊन पंचनामा केला. डोक्यात दगड मारल्याने जखमी होऊन मृत्यू झाल्याचे प्राथमिक तपासात निष्पन्न झाले. सुभाष गुलाब बोरकर (55) असे मृताचे नाव असून त्यांचा दारू विक्रीचा व्यवसाय होता. पोलिसांनी तपास सुरु केला असता सीसीटीव्ही आणि तांत्रिक तपासावरून आरोपी रोहित बालकराम मालवी (28) याला ताब्यात घेतले. अधिक चौकशी केली असता रोहितनेच हत्या केली असल्याची कबुली दिली.

सुभाषने रोहितला काही पैसे उधार दिले होते. ते पैसे काही महिन्यांपूर्वी त्याने परतही केले होते. मात्र, त्यानंतरही दररोज सुभाष त्याच्याकडे जाऊन त्याला शिवीगाळ करायचा. बुधवारीही सुभाषने रोहितच्या घरी जाऊन शिवीगाळ केली. त्यामुळे रोहितला राग आला आणि त्याने सुभाषच्या डोक्यात दगड मारला. यात सुभाष गंभीर जखमी झाल्याने त्याचा मृत्यू झाला. याप्रकरणी गुरुवारी पोलिसांनी आरोपीला अटक केली असून अधिक तपास चालू आहे.