देवकुंडला 144 कलमाचे लॉक

पर्यटकांच्या सुरक्षेसाठी सिक्रेट पॉईंट, ताम्हिणी घाट, देवकुंड परिसरात मनाई

। माणगाव । वार्ताहर ।

माणगाव तालुक्यातील प्रसिद्ध असलेल्या पर्यटनस्थळी कोणतीही दुर्घटना घडू नये म्हणून शासनाच्यावतीने खबरदारीची उपाययोजना म्हणून माणगाव उपविभागीय दंडाधिकारी डॉ. संदीपान सानप यांनी माणगांव तालुक्यातील भिरा गावच्या हद्दीतील देवकुंड धबधबा व सणसवाडी गावचे हद्दीतील सिक्रेट पॉईंट, ताम्हाणी घाट व आजुबाजूच्या 1 कि.मी. परिसरात 05 जुलै ते 30 सप्टेंबर या कालावधीसाठी प्रतिबंधात्मक आदेश लागू करीत 144 कलमाचे लॉक लावले आहे. त्यामुळे वर्षासहलीसाठी येणार्‍या उत्साही पर्यटकांच्या उत्साहावर निरुत्साहाचे पाणी पडले आहे.

रवाळजे दूरक्षेत्र अंतर्गत, भिरा गावचे हद्दीतील देवकुंड धबधबा, सणसवाडी गावचे हद्दीतील सिक्रेट पॉईंट व ताम्हाणी घाट येथे कलम 144 च्या तरतुदी लागू करण्याबाबत प्रस्ताव सादर केला आहे. सदरचा परिसर पावसाळी हंगामात पुणे-मुंबई व महाराष्ट्रातील पर्यटकांचे आकर्षणाचे ठिकाण आहे. हि ठिकाणे नैसर्गिक दुर्गम भागात असल्यामुळे तेथे कोणत्याही सुरक्षेच्यादृष्टीने उपाययोजना करण्यात आलेल्या नाहीत.

सन 2017 च्या पावसाळी हंगामात या ठिकाणी भेट दिलेल्या पर्यटकांमधील 4 पर्यटक नदीच्या प्रवाहात वाहत जाऊन मृत्यूमुखी पडले होते. सुमारे 55 पर्यटक हे अचानक पाण्याचा जोर वाढल्याने नदीचे पात्राचे ठिकाणी अडकले होते. सन 2018 चे पावसाळी हंगामातदेखील 144 अन्वये मनाई आदेशाची मुदत संपल्यानंतर 3 पर्यटक हे नदीच्या प्रवाहात वाहून मृत्युमुखी पडले होते.

सन 2022 मध्ये एक पर्यटक नदीच्या पाण्याचा प्रवाह अचानक वाढल्याने पाण्यात वाहून जाऊन मृत्युमुखी पडला आहे. त्याचबरोबर सिक्रेट पॉईंट या ठिकाणी सुरक्षा व्यवस्थेचा अभाव असल्याने पर्यटकांना अनेक अडचणींना सामोरे जावे लागते व ताम्हीणी घाट हा धोकादायक वळणांचा व तीव्र उताराचा असल्याने तसेच दरड कोसळण्याचा संभव असल्याने पर्यटकांची वित्त व जीवित हानी होऊ शकते. या कारणांमुळे देवकुंड धबधबा, सिक्रेट पॉईंट व ताम्हाणी घाट ही पर्यटन स्थळे सुरक्षित नसल्याने या परिसरात मनाई आदेश पारीत केले आहेत.

पावसामुळे निर्माण झालेल्या नैसर्गिक धबधब्यांच्या परिसरामध्ये मद्यपान करणे किंवा मद्यधुंद अवस्थेत प्रवेश करणे, मद्य बाळगणे, मद्य वाहतूक करणे, अनधिकृत मद्य विक्री करणे व उघडया जागेवर मद्य सेवन करणे, पावसामुळे धोकादायक झालेली ठिकाणे, धबधबे, दर्‍यांचे कठडे, धोकादायक वळणे, इ. ठिकाणी सेल्फी काढणे व कोणत्याही स्वरुपाचे चित्रीकरण करणे तसेच रहदारीवर परिणाम करणार्‍या ठिकाणी फोटोग्राफी करणे, रिल्स व्हिडीओ बनविणे, पावसामुळे वेगाने वाहणार्‍या धोकादायक पाण्यात, खोल पाण्यात उतरणे व त्यामध्ये पोहणे, धबधब्याच्या वरील बाजूला जाणे अथवा धबधब्याच्या धोकादायकरीत्या पडणार्‍या पाण्याच्या झोताखाली बसणे, धोकादायक स्थिती निर्माण होईल अगर जीवित हानी होईल, असे धबधबे किंवा तलाव याठिकाणी पाण्यात उतरणे, रहदारीच्या ठिकाणी तसेच धोकादायक ठिकाणी वाहने थांबवणे, वाहने अतिवेगाने व वाहतूकीस अडथळा निर्माण होईल अशाप्रकारे चालविणे, वाहनाची ने-आण करतांना बेदरकारपणे वाहन चालवून इतर वाहनांना धोकादायक स्थितीत ओव्हरटेक करणे, टिंगळटवाळी करणे, महिलांशी असभ्य वर्तन करणे यावर बंधने आणली आहेत.

महिलांशी असभ्य वर्तन करणे, सार्वजनिक ठिकाणी मोठ्या आवाजात संगीत यंत्रणा वाजवणे, डिजे. सिस्टिम वाजवणे, गाडीमधील स्पिकर, उफर वाजवणे व त्यामुळे ध्वनीप्रदूषण करणे, ज्या कृतीमुळे ध्वनी, वायू व जल प्रदूषण होईल अशी कोणतीही कृती करणे, धरण, धबधब्याचे 1 कि.मी. परिसरात वाहनांना प्रवेश करण्यावर बंदी घालण्यात आली आहे.