रायगडमध्ये ध्वनीवर्धकांना मध्यरात्रीपर्यंत मुभा

जिल्हाधिकाऱ्यांकडून वर्षातील 15 दिवस सर्शत सूट

| अलिबाग | प्रतिनिधी |

केंद्रीय पर्यावरण मंत्रालयाच्या सुधारित नियमांनुसार रायगड जिल्ह्यात 2026 सालात निवडक 15 दिवस ध्वनीवर्धक व ध्वनीक्षेपक वापरास रात्री 12 वाजेपर्यंत सशर्त सूट देण्यात आली आहे. जिल्हाधिकारी किशन जावळे यांच्या आदेशानुसार ही मुभा सकाळी 6 ते मध्यरात्रीपर्यंत लागू राहणार असली तरी राज्य शासनाने घोषित केलेल्या शांतता क्षेत्रांमध्ये ही सूट लागू होणार नाही.

केंद्रीय पर्यावरण मंत्रालयाच्या ध्वनीप्रदूषण (नियमन व नियंत्रण) सुधारित नियम, 2017 नुसार जिल्ह्याच्या गरजेनुसार वर्षातील 15 दिवस ध्वनीवर्धक व ध्वनीक्षेपक वापरास सकाळी 6 ते रात्री 12 वाजेपर्यंत सूट देण्याचे अधिकार जिल्हाधिकाऱ्यांना प्रदान करण्यात आले आहेत. या अधिकाराचा वापर करत रायगडचे जिल्हाधिकारी तथा जिल्हादंडाधिकारी किशन जावळे यांनी 1 जानेवारी 2026 ते 31 डिसेंबर 2026 या कालावधीत निवडक 15 दिवसांसाठी ही सूट जाहीर करणारी अधिसूचना प्रसिद्ध केली आहे.

या आदेशानुसार श्रोत्यांसाठी असलेली बंदिस्त ठिकाणे जसे श्रोतृगृहे, सभागृहे, सामूहिक सभागृहे आणि मेजवानी कक्ष वगळता इतर सर्व ठिकाणी ध्वनीची निर्धारित मर्यादा पाळून सकाळी 6 ते रात्री 12 वाजेपर्यंत ध्वनीवर्धक व ध्वनीक्षेपक वापरण्यास परवानगी राहणार आहे. सूट देण्यात आलेल्या दिवसांमध्ये शिवजयंती (19 फेब्रुवारी), होळी पौर्णिमा (2 मार्च), डॉ. बाबासाहेब आंबेडकर जयंती (14 एप्रिल), ईद-ए-मिलाद (26 ऑगस्ट), गणपती उत्सवातील दुसरा दिवस (15 सप्टेंबर), गौरी विसर्जन (19 सप्टेंबर), अनंत चतुर्दशी (25 सप्टेंबर), साखरचौथ विसर्जन (30 सप्टेंबर), नवरात्री उत्सव (17 ते 20 ऑक्टोबर), दिवाळी लक्ष्मीपूजन (8 नोव्हेंबर), ख्रिसमस (25 डिसेंबर) आणि 31 डिसेंबर या दिवसांचा समावेश आहे.

दरम्यान, राज्य शासनाने घोषित केलेल्या शांतता क्षेत्रांमध्ये ही सूट लागू राहणार नसल्याचे आदेशात स्पष्ट करण्यात आले आहे. तसेच ध्वनीप्रदूषण (नियमन व नियंत्रण) नियम, 2000 मधील तरतुदींचे उल्लंघन झाल्यास महाराष्ट्र प्रदूषण नियंत्रण मंडळामार्फत पर्यावरण संरक्षण कायदा, 1986 च्या कलम 19 (अ) अन्वये संबंधितांवर आवश्यक ती कारवाई करण्यात येणार असल्याचेही नमूद करण्यात आले आहे.