महामुंबई बँकेचा महाघोटाळा उघड

उपनिरिक्षक नरेंद्र पाटील यांची धडक कामगिरी

। पनवेल । वार्ताहर ।

गुंतवणूकदारांना जादा व्याजदराचे आमिष दाखवून नंतर त्यांची आर्थिक फसवणूक केल्याचा प्रकार पनवेलमधील कामोठे येथील महामुंबई अर्बन निधी लिमिटेड बँकेत घडला आहे. याप्रकरणी गुंतवणूकदारांनी दिलेल्या फिर्यादीवरुन बँकेच्या संचालक मंडळ व चेअरमन यांच्यावर आर्थिक फसवणुकीचा गुन्हा नुकताच दाखल करण्यात आला आहे. या बँकेतील गैरव्यवहाराबाबत पत्रकार मित्र असोसिएशनने 31 जानेवारीला पोलिस आयुक्तांबरोबर पत्रव्यवहार केला होता. पोलिस उपनिरिक्षक नरेंद्र पाटील यांनी अहोरात्र मेहनत घेत गुन्हा दाखल करत आपल्या कामगिरीने महामुंबई बँकेचा महाघोटाळा उघड केला असून सखोल चौकशीत हा घोटाळा अजून विविध प्रकारे उघड होण्याची शक्यता वर्तवण्यात येत आहे.

महामुंबई बँकेत गुंतवणूक केली तर 1 लाख रुपयांमागे वर्षाला 10.5 टक्के, तर महिन्याला 8 टक्के कमिशन देण्याचे आमिष दाखवण्यात आले होते. जादा व्याजदर मिळेल या आशेने अनेक सर्वसामान्य लोकांनी आपले पैसे महामुंबई बँकेत गुंतवले होते. मात्र, गुंतवणूक दारांची दिशाभूल करुन संचालक मंडळाने संबंधितांचे पैसे मिनर्वा ब्रोकींग या स्वत:च्या कंपनीच्या खात्यावर स्विकारले होते. बँकेत गुंतवणूक केलेल्या रकमेचा परतावा विहित वेळेत न मिळाल्याने आमच्यासह अन्य गुंतवणूकदारांची फसवणूक झाल्याची फिर्याद कामोठे येथील रेणुका विजय कुराडे यांनी कामोठे पोलिस ठाण्यात केली होती. त्यानुसार वरिष्ठ पोलिस निरिक्षक अजय कांबळे, सहायक पोलिस निरिक्षक प्रशांत तायडे यांनी तपास सुरू केला होता. यावेळी पोलिस उपनिरिक्षक नरेंद्र पाटील यांनी पुरावे गोळा करत गुन्हा दाखल करण्याच्या प्रक्रीयेस वेग दिला. गुंतवणूकदार रेणुका कुराडे यांचे 2 कोटी 12 लाख 24 हजार 800 रुपये तसेच इतर 71 गुंतवणूक दारांच्या रक्कमेचा गैरव्यवहार केला म्हणून महामुंबई अर्बन निधी लिमिटेड कामोठेचे संचालकांवर गुन्हा दाखल करण्यात आला आहे.

पोलिसांशी संपर्क साधण्याचे आवाहन
कामोठे येथील महामुंबई अर्बन निधी लिमिटेड बँकेत गुंतवणूकदारांची आर्थिक फसवणूक केली म्हणून संचालक मंडळावर गुन्हा दाखल झाला आहे. या बँकेत अजूनही कोणाचे पैसे अडकले असतील तर त्यांनी आर्थिक गुप्तवार्ता पथक नवी मुंबई 02227573071, 7700920766 यांच्याशी संपर्क साधावा असे, आवाहन नवी मुंबई पोलिसांनी केले आहे.