21 पैकी 20 जागांवर आघाडीच्या उमेदवारांची निवड
। जळगाव । प्रतिनिधी ।
जळगाव जिल्हा बँक निवडणुकीवर भाजपनं बहिष्कार टाकल्याने 21 पैकी 20 जागांवर विजय मिळवित महाविकास आघाडी प्रणित सहकार पॅनलने आपले निर्विवाद वर्चस्व सिद्ध केले आहे. भाजपचे आमदार संजय सावकारे यांचा विजय आणि रावेर सोसायटी मतदारसंघातून माघार घेतलेल्या उमेदवाराचा विजय हे निकालाचं वैशिष्ट्य ठरलं आहे.
जिल्हा बँकेच्या 10 जागांसाठी आज मतमोजणी झाली. या निवडणुकीवर भाजपने बहिष्कार टाकला होता. त्यामुळे महाविकास आघाडीचा विजय हा निश्‍चितच होता. 21 पैकी 11 जागा बिनविरोध झाल्या होत्या. तरी देखील राष्ट्रवादी, काँग्रेस व भाजपच्या काही असंतुष्टांनी मिळून शेतकरी विकास पॅनल तयार केले होते. मात्र, सहकार पॅनलने शेतकरी पॅनलचा अक्षरश: धुव्वा उडवला. भुसावळच्या जागेव्यतिरिक्त राखीव मतदार संघाच्या सर्व सहा व सोसायटी मतदारसंघाच्या 3 अशा एकूण 9 जागांवर महाविकासच्या सहकार पॅनलचे उमेदवार विजयी झाले. तर भाजपचे आमदार संजय सावकारे हे भुसावळ तालुका सोसायटी गटातून अपक्ष उमेदवार म्हणून निवडून आले आहेत.
राखीव मतदारसंघाच्या सहाही जागांवर महाविकास आघाडीचे उमेदवार विजयी झाले. यात इतर मतदारसंघातून माजी मंत्री गुलाबराव देवकर, ओबीसी मधून डॉ. सतीश पाटील, एस.एसटी मतदार संघातून श्यामकांत सोनवणे, एन.टी. मतदारसंघातून मेहताबसिंग नाईक तर महिला राखीव मधून शैलजा निकम व ड. रोहिणी खडसे या विजयी झाल्या आहेत.
रावेर सोसायटी मतदारसंघातून माजी आमदार अरुण पाटील यांचा अवघ्या एका मताने धक्कादायक पराभव झाला असून, या मतदारसंघात निवडणुकीत जाहीर माघार घेतलेल्या जनाबाई महाजन या विजयी झाल्या आहेत. या अनपेक्षित व धक्कादायक निकालाची चर्चा जिल्ह्यातील राजकीय वर्तुळात रंगली आहे. या मतदारसंघात एकूण 54 मतदान होते. त्यापैकी जनाबाई महाजन यांना 26 तर अरुण पाटील 25 मते पडली. तर 3 मते बाद झाली. अवघ्या एका मताने जनाबाई महाजन या विजयी झाल्या आहेत.
जिल्हा बँकेच्या निवडणुकीत भाजपने बहिष्कार टाकून सर्व उमेदवारांनी माघार घेतली होती. मात्र, भुसावळचे आमदार संजय सावकारे यांच्यासह इतर संस्था मतदार संघातून जि. प. शिक्षण सभापती रविंद्र पाटील यांनी आपले अर्ज कायम ठेवले होते. त्यापैकी भुसावळ मतदारसंघात संजय सावकारे यांनी एकतर्फी विजय मिळवला.
शिवसेनेच्या 6 जागा कायम
महाविकास आघाडी असली तरी राष्ट्रवादी कॉग्रेसने या निवडणुकीत सहकारमधील आपले वर्चस्व सिध्द केले आहे. 21 पैकी तब्बल 12 जागा जिंकल्य आहेत. शिवसेनेने पूर्वीप्रमाणेच आपल्या 6 जागा कायम राखल्या आहेत. तर महाविकास आघाडीत 4 जागांची मागणी करणार्‍या कॉग्रेसला 2 जागा मिळाल्या आहेत. कॉग्रेसच्या काही पदाधिकार्‍यांनी केलेल्या आरोपानुसार जिल्हा बँकेत विजयी झालेले उमेदवार राष्ट्रवादीचेच आहेत. त्यामुळे काँग्रेस आघाडीत कमजोरच राहीली आहे.
जिल्हा बँकेचे पक्षीय बलाबल
एकूण जागा 21
राष्ट्रवादी कॉग्रेस – 12
शिवसेना – 6
कॉग्रेस – 2
अपक्ष (भाजप) – 1
विजयी उमेदवार
रावेर मतदार संघ – जनाबाई महाजन
यावल मतदार संघ- विनोद पाटील
चोपडा मतदार संघ- घनश्याम अग्रवाल
भुसावळ मतदार संघ- संजय सावकारे
इतर संस्था मतदार संघ- गुलाबराव देवकर
ओबीसी -डॉ. सतीश पाटील
एससी.एसटी -श्यामकांत सोनवणे
व्ही. जे. एनटी-मेहताबसिंग नाईक
महिला राखीव- रोहीणी खडसे
महिला राखीव- शैलेजा निकम