चंदननगरमधील वसाहतीत भीषण आग; अनेकांच्या संसाराची राखरांगोळी

10 गॅस सिलिंडरचा स्फोट

। पुणे । प्रतिनिधी ।

नगर रस्त्यावरील चंदननगर भागातील डॉ. बाबासाहेब आंबेडकर वसाहतीत बुधवारी (दि. 23) पहाटे आग लागली. आग लागल्याची माहिती मिळताच रहिवासी बाहेर पळाल्याने गंभीर दुर्घटना टळली. अग्निशमन दलाच्या जवानांनी दोन तासांच्या अथक प्रयत्नानंतर आग आटोक्यात आणली. आग लागल्यानंतर 10 गॅस सिलिंडरचा स्फोट झाल्याने घबराट उडाली. आगीत 50 पेक्षा जास्त झोपड्या जळाल्या असल्याची माहिती मिळत आहे.

चंदननगर भागातील डॉ. बाबासाहेब आंबेडकर वसाहतीत कष्टकरी मोठ्या संख्येने राहायला आहेत. बुधवारी पहाटे पाचच्या सुमारास वसाहतीतील झोपड्यांना आग लागली. या घटनेची माहिती मिळताच अग्निशमन दलाचे 15 बंब आणि टँकर घटनास्थळी दाखल झाले. आग भडकल्यानंतर वसाहतीतील नागरिक बाहेर पळाल्याने गंभीर दुर्घटना टळली. झोपड्यांमधील दहा गॅस सिलिंडरचा स्फोट झाल्याने आग भडकली. स्फोटाच्या आवााजमुळे घबराट उडाली.

आगीचे निश्‍चित कारण समजू शकले नाही. जवानांच्या अथक प्रयत्नानंतर आगीवर नियंत्रण मिळाले. मात्र, आगीत झोपड्यांमधील गृहोपयोगी वस्तू जळून खाक झाल्याने अनेकांना दु:ख अनावर झाले. सुदैवाने आगीत कोणी जखमी झाले नाही. जवानांनी झोपड्यांमधून 100 पेक्षा जास्त सिलिंडर बाहेर काढले. त्यामुळे मोठी दुर्घटना टळली.