मटका जुगार बनला ‌‘हायटेक’; पोलिसांची कारवाई तोकडी

जुगाराची चिठ्ठी घेतली जाते ऑनलाईन

| रायगड | प्रतिनिधी |

सध्या आर्थिक व्यवहार ‌‘डिजिटल’ झाले असून, त्याला मटका आणि पत्त्यांचा जुगारही अपवाद राहिला नाही. जुगार खेळणाऱ्यांनीही शक्कल लढवत जुगार ‌‘हायटेक’ केला आहे. त्यामुळे पोलिसांना कारवाईसाठी अडचणी निर्माण होत आहेत.

ताशपत्त्याच्या जुगाराचे अनेक अड्डे रायगडात आहेत. स्थानिक पोलीस आणि गुन्हे शाखा वारंवार छापे घालत असल्यामुळे अनेक जुगार अड्डे संचालकांवर गुन्हे दाखल झाले आहेत. जुगार अड्ड्यांवरील पोलिसांची छापेमारी लक्षात घेता आता ताशपत्त्याचा जुगार खेळ ‌‘डिजिटल’ करण्यात आला आहे. जुगार खेळणाऱ्यांनी नवीनच शक्कल लढवली असून, जुगाराच्या खेळात पोलिसांच्या हाती पैसे लागणार नाही, अशी व्यवस्था केली आहे. स्थानिक सत्ताधारी नेत्यांच्या राजकीय वरद हस्तामुळे जिल्ह्यात मटका जुगाराचे धंदे तेजीत असून, हायटेक मटका आणि जुगाराच्या धंद्यांनी पोलिसांच्या नाकात दम आणला आहे.

हार जीतची बाजी खेळताना जुगारात थेट पैसे न टाकता जिंकणाऱ्या व्यक्तीला ऑनलाईन देवाण-घेवाण करण्यात येत आहे. त्यासाठी ‌‘पेटीएम, गुगल पे, फोन पे’ अशा मोबाईल ॲपचा वापर करण्यात येतोय. जुगाराच्या डावात पैसे नसल्यामुळे जुगार खेळणाऱ्यांवर योग्य ती कारवाई करण्यास अडचणी येतात. जुगाराच्या अड्ड्यावर पोलिसांनी छापा घातला तरी काहीच रक्कम मिळून येत नसल्यामुळे पोलीसही चक्रावले आहेत. या जुगारात एकमेकांना ‌‘फोन पे’ ॲपवर पैसे पाठवून जुगार खेळत असल्याने जुगार ‌‘ऑनलाईन’ खेळाला जात असल्याची चर्चा आहे. जिल्ह्यात अनेक ठिकाणी स्थानिक नेत्यांच्या राजकीय वरदहस्तामुळे पत्त्यांचे अनधिकृत क्लब सुरु आहेत. या क्लबचे टिपर पोलीस खात्याबरोबर कनेक्ट असल्याने धाड पडणार असेल तर आधीच अड्डा संचालकांना कळते. यामुळे थातुरमातुर कारवाई करण्यात येते. या अनधिकृत क्लबमध्ये रम्मी आणि तीन पत्ती जुगाराचा डाव रंगला जात आहे. या डावांमध्ये राजकीय पक्षांचे नेतेदेखील आपले नशीब अजमावण्यासाठी येत असल्याची माहिती गुप्त सूत्रांनी दिली.

मटका ‌‘व्हॉट्सॲप’वर
रायगड जिल्ह्यातील प्रत्येक पोलीस ठाण्याच्या हद्दीत मटका सुरू आहे. परंतु, मटकासुद्धा ऑनलाईन झाला आहे. आकडे लावणारा व्यक्ती ‌‘व्हॉट्सॲप’वरून आकड्याची चिठ्ठी पाठवतो आणि तेवढेच पैसे फोन पे किंवा पेटीएमद्वारे पाठवतो. अड्डा संचालक त्या व्यक्तीला चिठ्ठीचा फोटो काढून पाठवतो. त्याचा आकडा आल्यास त्याला ऑनलाईन पैसे देण्यात येतात. विशेष म्हणजे, जिल्ह्याचे मुख्यालय असणाऱ्या अलिबाग शहरात मटका आणि जुगाराचे अड्डे बिनधोकपणे सुरु आहेत. कल्याण आणि मेन असे दोन मटक्याचे प्रकार सध्या भाव खाऊन गेले आहेत.

अकड्यातून मिळणारी रक्कम
मडक्यातील खेळ प्रकारात सिंगल आकड्यासाठी 1 रुपयाला 9 रुपये, जोड आकड्यासाठी 1 रुपयाला 90 रुपये, चौकडा आकड्याला 1 रुपयाला एक हजार रुपये, संगम आकड्याला 1 रुपयाला दहा हजार रुपये, सायकल पाना दहा रुपयाला 150 रुपये, मोटर पाना 10 रुपयाला 150 रुपये, सिंगल पाना 1 रुपयाला 150 रुपये, डबल पाना 1 रुपयाला 280 रुपये असा रेट देण्यात येतो. विशेष म्हणजे, मटका जुगार विश्वासावर खेळाला जात असल्याचे एका मटका बहाद्दराने नाव न सांगण्याच्या अटीवर सांगितले.

कारवाईवर बंधनं?
रायगड जिल्हा औद्योगिक, राजकीय, रियल इस्टेट या क्षेत्रात प्रगती करीत असला तरी वाढत्या मटका जुगाराच्या धंद्यांचा विळखा जिल्ह्याला बसत असल्याचे चित्र पाहावयास मिळत आहे. जिल्ह्यात शहरी आणि ग्रामीण भागात सुमारे एक हजारहून अधिक मटका जुगाराचे धंदे खुले आम सुरु आहेत. रायगड पोलीस या अड्ड्यांवर कारवाई करीत असलेतरी राजकीय हस्तक्षेपांमुळे त्यांनादेखील आपली काठी आवरती घ्यावी लागत आहे. तक्रारीनुसार जुगाराच्या धंद्यावर एकीकडे पोलिसांनी कारवाई करायची आणि दुसरीकडे नेत्यांचा मोबाईल अधिकाऱ्यांना आल्यावर जुगार चालविणाऱ्यांना सोडून द्यायचे, अशी नेहमीची प्रॅक्टिस असल्याची चर्चा पोलीस ठाण्याच्या परिसरात ऐकावयास येत आहे.