बोटावरची शाई दाखवा, सवलत मिळवा

व्यापार्‍यांकडून नागरिकांना मतदान करण्याचे आवाहन

। ठाणे । वृत्तसंस्था ।

जिल्ह्यात मतदानाचा टक्का वाढविण्यासाठी जिल्हा निवडणूक विभागासह जिल्हा, महापालिका प्रशासन तसेच विविध सामाजिक संस्थांच्या माध्यमातून मतदान जनजागृतीपर विविध कार्यक्रम राबविले जात असतानाच, आता जिल्ह्यातील व्यापारी वर्गदेखील मतदानाचा टक्का वाढविण्यासाठी पुढे सरसावल्याचे दिसून येत आहे. उपनगरातील अनेक व्यापार्‍यांनी ‘मतदान केल्याची शाई दाखवा, खरेदीवर सवलत मिळवा’ अशा आशयाची जाहीरात प्रसारित केल्याचे दिसत आहे. मतदानाच्या दिवशी आणि त्यानंतर सलग तीन ते चार दिवस खरेदीवर 10 ते 20 टक्केपर्यंत सवलती दिल्या जाणार असल्याची माहिती काही व्यापार्‍यांनी दिली.

विधानसभा सार्वत्रिक निवडणुकीसाठी येत्या 20 नोव्हेंबरला मतदान पार पडणार आहे. या निवडणुकीत मतदानाचे प्रमाण वाढविण्यासाठी निवडणूक आयोग तसेच स्थानिक प्रशासनाकडून विविध उपक्रम राबविले जात आहेत. निवडणूक आयोगाच्या स्वीप कार्यक्रमाअंतर्गत विधानसभा मतदार संघात ध्वनीक्षेपक, फलक, पथनाट्य अशा विविध माध्यमातून मतदानाबाबत जनजागृती केली जात आहे. नागरिकांनी मतदानाचा हक्क बजावावा यासाठी गुरुवारी ठाणे जिल्ह्यात शासकीय कार्यालय, सामाजिक संस्था, शाळा तसेच महाविद्यालयांमध्ये सामुहिक संकल्पही करण्यात आला. आता, यापाठोपाठ, जिल्ह्यातील व्यापारी वर्गदेखील मतदानाचा टक्का वाढविण्यासाठी पुढे सरसावले आहेत. ठाणे तसेच उपनगरातील मोबाईल विक्रेते, कपडे विक्रेते, इलेक्ट्रॉनिक वस्तू विक्रेते अशा अनेक व्यापार्‍यांनी मतदारांना प्रोत्साहित करण्यासाठी विशेष सवलती दिल्या आहेत. ‘मतदान केल्याची शाई दाखवा आणि सवलत मिळवा’ अशा आशयाचा अनेक विक्रेत्यांचा संदेश समाजमाध्यमांवर प्रसारित होताना पाहायला मिळत आहे. मतनाच्या दिवशी आणि त्यानंतर पुढील दोन दिवस या सवलतींचा ग्राहकांना लाभ घेता येणार असल्याची माहिती ठाण्यातील एका विक्रेत्याने दिली.

डोंबिवलीतील एका बड्या व्यापार्‍याने एक पत्रक प्रसारित केल आहे. त्यामध्ये ‘प्रिय मतदारराजा’ अशी मतदारांना साद घालत, प्रत्येक नागरिकाने मतदान हक्क बजाविणे आपले कर्तव्य आहे. असे म्हणत, जो नागरिक मतदानाचा हक्क बजावेल आणि मतदान केल्याची शाई दाखवेल त्याला 500 रुपयांच्या आणि त्यावरील खरेदीवर 10 टक्के सुट देण्यात येईल असा संदेश लिहिण्यात आला आहे. ही सवलत 20 मे ते 23 मे या कालावधीपुरती असणार आहे.