मिशन कवच कुंडल तीन दिवसात 75 हजार 627 जणांचे लसीकरण

जिल्हा परिषदेचे मुख्य कार्यकारी अधिकारी डॉ. किरण पाटील यांनी दिली माहिती
। अलिबाग । विशेष प्रतिनिधी ।
करोना विषाणू प्रादुर्भाव व त्यामुळे होणारे मृत्यूचे प्रमाण कमी करण्यासाठी नागरिकांचे करोना प्रतिबंधात्मक लसीकरण करण्यात येत आहे. रायगड जिल्ह्यात कोरोना लसीकरण मोहीम जोमाने सुरू असून, नवरात्र उस्तवानिमित्त 8 ते 14 ऑक्टोंबर दरम्यान मिशन कवच कुंडल नावाने लसीकरण मोहीम राबविण्यात येत आहे. या मोहिमअंतर्गत 8 ते 10 ऑक्टोंबर या तीन दिवसात 75 हजार 627 जणांना कोरोना प्रतिबंधात्मक लसीचा डोस देण्यात असल्याची माहिती, जिल्हा परिषदेचे मुख्य कार्यकारी अधिकारी डॉ. किरण पाटील व जिल्हा परिषदेचे आरोग्य अधिकारी डॉ. सुधाकर मोरे यांनी दिली आहे.
करोनाची तिसरी लाट येण्याची शक्यता तज्ज्ञांकडून वर्तविण्यात येत असून, तिसर्‍या लाटेचा मुकाबला करण्यासाठी प्रशासन सज्ज होत आहे. कोरोना प्रादूर्भाव तसेच त्यामुळे होणारे मृत्यूचे प्रमाण कमी करण्यासाठी जास्तीत जास्त नागरिकांनी करोना प्रतिबंधक लस घेणे गरजेचे असून, 8 ते 14आक्टोबर दरम्यान रायगड जिल्ह्यात मिशन कवच कुंडल नावाने विशेष कोरोना लसीकरण मोहीम राबविण्यात येत आहे. जिल्ह्यात विशेष कोरोना लसीकरण मोहिमेसाठी योग्य नियोजन करण्यात आले आहे. या मोहिमेअंतर्गत प्रत्येक गावासाठीचे स्वतंत्र नियोजन करण्यात आले आहे. लसीकरण मोहिमेत आरोग्य विभागासोबत इतर विभागांची मदत घेतली जात आहे. लसीकरण ठिकाणची व्यवस्था लाभार्थीना लसीकरण ठिकाणी बोलावण्याची जबाबदारी इतर विभागाच्या कर्मचार्‍यांवर सोपविण्यात आली आहे. लसीकरण मोहिमेची जनजागृती करण्यात आली आहे. यासाठी दबंडी देणे, मायकिंग, गृहभेटी इत्यादी माध्यमांचा वापर करण्यात आला.
मिशन कवच कुंडल मोहिमेला जिल्ह्यातील नागरिकांचाही उत्तम प्रतिसाद मिळाला असून, 8 ते 10 ऑक्टोंबर या तीन दिवसात 75 हजार 627 जणांनी कोरोना प्रतिबंधात्मक लसीचा डोस घेतला. यामध्ये जिल्हा परिषदेच्या प्राथमिक आरोग्य केंद्र व उपकेंद्रांवर 37 हजार 630 जणांचे लसीकरण करण्यात आले असून, पनवेल महानगर पालिका 21 हजार 692, जिल्हा रुग्णालय, उपजिल्हा रुग्णालये, ग्रामीण रुग्णालये 12 हजार 764 तर खासगी लसीकरण केंद्रांवर 3 हजार 541 जणांचे लसीकरण करण्यात आले. मिशन कवच कुंडल तारखेनुसार झालेले लसीकरण दि.8 ऑक्टोंबर : 30 हजार 3249 ऑक्टोंबर : 27 हजार 972, 10 ऑक्टोंबर : 17 हजार 331.