एमपी 93 प्लॉटचा ताबा अद्यापही नगरपरिषदेला नाहीच

वाहतूक कोंडीचे ग्रहण कायम

। माथेरान । वार्ताहर ।

माथेरानबद्दल प्रचंड आत्मीयता आणि प्रेम असल्यामुळे याठिकाणी मोठ्या प्रमाणावर पर्यटकांची गर्दी होत असते. परंतु, येथे आल्यावर दस्तुरी वाहन पार्किंगमध्ये सुट्ट्यांच्या हंगामात वाहने पार्किंग करण्यासाठी जागा उपलब्ध नसते. जागोजागी इमारतीचे सामान अस्तव्यस्त पडलेले असून कुठेतरी जंगलात किंमती वाहने पार्क करावी लागतात. याच ठिकाणी एमपी 93 हा प्लॉट असून याचा ताबा अद्यापही नगरपरिषदेला मिळालेला नाही. यामुळेच पर्यटकांना वाहतूक कोंडीला सामोरे जावे लागत आहे.

आगामी दिवाळी पर्यटन हंगाम जवळ आला असून नेहमीप्रमाणे माथेरान घाटात वाहतूक कोंडी होणार हे नवीन नाही. या कोंडीतून मार्ग काढताना पर्यटकांना आपल्या लवाजम्यासह माथेरान गाठणे म्हणजे एक प्रकारे येथे येण्याची शिक्षाच असते. वनखात्याच्या अंतर्गत असणार्‍या वन समितीच्या माध्यमातून वाहन कर आकारणी केली जाते. तर, नगरपरिषदेकडून प्रवासी करासोबतच वाहन कर आकारणी सुद्धा केली जाते. दोन्ही खात्यांकडून दुबार वाहन कर आकारणी घेऊन सुद्धा येथे सुरक्षित पार्किंग व्यवस्था उपलब्ध नाही. ही संपूर्ण जागा वनखात्याच्या अखत्यारीत येत असून वन समिती केवळ जागेचे भाडे आकारते. परंतु, वाहनांची कोणत्याही प्रकारची जबाबदारी घेतली जात नाही. यामुळे बेभरवशाचा खेळ करत पर्यटकांना आपली किंमती वाहने पार्क करून गावात यावे लागते. तसेच, जर का वाहनांची देखभाल घेतली जात नसेल तर पार्किंग आकारणी घेऊ नये, असे पर्यटक बोलत आहेत.

मी 2007 साली नगराध्यक्ष असताना हा प्लॉट नगपरिषदेकडे हस्तांतरीत करण्याचा प्रस्ताव केला. त्याला प्रतिसाद देत तत्कालीन जिल्हाधिकारी निपुण विनायक यांनी हा भुखंड खासगी ट्रस्टकडून सरकारजमा करुन घेतला. यानंतर हा 5.5 एकरचा भुखंड नगरपरिषदेकडे हस्तांतरीत करण्याकरीता प्रस्ताव महाराष्ट्र शासनाकडे पाठविला. दुर्दैवाने मागील 15 वर्ष हा प्रस्ताव शासकीय पुर्ततांच्या लालफितीत अडकून पडला होता. मागील दिड वर्ष मी मंत्रालय, जिल्हाधिकारी कार्यालय, कोकण आयुक्त कार्यालय व नगरपरिषद यांचेबरोबर सातत्याने समन्वय साधत आहे. लवकरच राज्याचे मुख्यमंत्री हा प्लॉट नगरपरिषदेकडे हस्तांतरीत करण्याचा प्रस्ताव मंजूर करतील.

– मनोज खेडकर, माजी नगराध्यक्ष, माथेरान

माथेरान हे जगप्रसिध्द थंड हवेचे ठिकाण असताना पार्किंगसाठी जवळपास 16 वर्षांपासून 93 एमपी प्लॉट नगरपालिका मागणी करीत आहे. राज्यसरकार पर्यटन वाढविण्यासाठी नवं नवीन पॉलिसी आणते. परंतु, माथेरानच्या पर्यटनासाठी आवश्यक प्लॉट राज्यसरकार कडून नगरपालिकेला हस्तांतरण होतं नाही, ही बाब गतिमान व्यवस्थेसाठी खेदजनक बाब आहे.

– शिवाजी शिंदे, माजी विरोधी पक्षनेते, माथेरान नगरपालिका