सार्वजनिक बांधकाम खात्याने घेतली दखल
। कोर्लई । वार्ताहर ।
मुरूड तालुक्यातील मुख्य रस्त्याच्या होत असलेल्या डांबरीकरणात दुतर्फा असलेल्या साईड पट्ट्या धोकादायक ठरत आहेत. या साईडपट्ट्या न भरल्यामुळे दुचाकी अपघातात वाढ होत असल्याचे समोर येत असून नुकताच एका दुचाकीस्वाराचा जीव जाता जाता वाचला आहे. एका रुग्णवाहिका चालकाच्या प्रसंगावधानतेमुळे प्राण वाचला आहे. या नवीन रस्त्याच्या साईडपट्ट्या लवकरात लवकर भरण्याची मागणी वाहन चालकांकडून होत असून या बाबतीचे वृत्त वृत्तपत्रातून प्रसिद्ध करण्यात आले होते.
साळाव मुरूड आगरदांडा रस्त्याचे डांबरीकरण करण्याचे काम जोरदार चालु आहे. परंतु, हे रस्ते करत असताना रस्त्याच्या दुतर्फा असलेल्या साईडपट्ट्या काही ठिकाणी सहा इंचापेक्षा जास्त खोल झाल्याने त्या धोकादायक ठरत आहेत. त्यामुळे दिवसात एकतरी अपघात होतो आहे. हे रस्ते करत असताना ताबडतोब साईड पट्ट्या भरणे गरजेचे आहे. तसेच, हे बनविलेले रस्ते अरुंद असल्याने अचानक मोठी गाडी आली की दुचाकी स्वारांना रस्त्याच्या खाली उतरावे लागत आहे. पण या साईड पट्ट्या 6 ते 8 इंच खोल असल्याने दुचाकी घसरून अपघात होत आहेत. या बाबतचे वृत्त वृत्तपत्रातून प्रसिद्ध होताच मुरुडच्या सार्वजनिक बांधकाम विभागाच्या संबंधित अधिकारी वर्गाने दखल घेऊन या रस्त्यावरील साईडपट्ट्या भरण्यास नुकतीच सुरुवात केली असल्याने वाहन चालकांकडून समाधान व्यक्त होत आहे.