गुरे चोरट्यांविरोधात नागोठणे पोलिसांची धडक कारवाई

12 म्हशी, 6 रेडे यांच्यासह 15 लाखांचा मुद्देमाल जप्त

। नागोठणे । प्रतिनिधी ।

रात्रीच्या अंधाराचा फायदा घेऊन गुरे चोरणाऱ्या टोळ्यांनी जिल्ह्यात हैदोस मांडलेला असतानाच नागोठणे पोलिसांनी शनिवारी (दि. 12) सकाळी एक आयशर टेम्पोवर कारवाई केली. या कारवाईत जनावरांची वाहतूक करणाऱ्या एक आरोपीसह एक आयशर टेम्पो व चोरीच्या 12 म्हशी व 6 रेडे अशी 18 जनावरे जप्त केली आहेत. आयशर टेम्पोसह जप्त केलेल्या मुद्देमालाची एकत्रित किंमत 15 लाख रुपये असून टेम्पोचालक मोसिन आसमहमंद कुरेशी (वय 25, रा. लोटस मोहल्ला, शिवाजी नगर, गोवंडी-मुंबई) याला नागोठणे पोलिसांनी ताब्यात घेतले आहे.

मिळालेल्या माहितीनुसार, शनिवारी सकाळी मुंबई-गोवा महामार्गावरून महाड ते मुंबई, जनावरांची वाहतूक करणारा आयशर टेम्पो येणार असल्याची माहिती गोरक्षक गुप्त बातमीदारांकडून नागोठणे पोलीस ठाण्याचे सपोनि सचिन कुलकर्णी यांना मिळाली होती. त्यांनी तात्काळ आपले सहकारी पोलीस उपनिरीक्षक राजहंस नागदिवे, पो.हे. कॉ. महेश लांगी व हे. कॉ. महेश रुईकर यांच्यासह मुंबई-गोवा महामार्गावर नागोठणे जवळील आयटीआय कॉलेज समोर सकाळी 6.30 वाजता नाकाबंदी केली. त्याचवेळी गुप्त बातमीदारार्फत माहिती मिळालेला लाल रंगाचा व एम. एच. 03 डीव्हि 8021 या क्रमांकाचा टेम्पो दिसताच या टेम्पोला थांबविण्यात आले. या टेम्पोची झडती घेतली असता त्यामध्ये 8 ते 10 वर्षे वयोगटाच्या 7 म्हशी व 5 रेडे प्रत्येकी 20 हजार रुपये (एकत्रित किंमत रुपये 2 लाख 40 हजार) किंमतीच्या तसेच, सुमारे दीड ते दोन वर्षे वयाच्या 5 म्हशी व एक रेडा जातीची सहा वासरे प्रत्येकी किंमत रुपये 10 हजार (एकत्रित किंमत रुपये 60 हजार) अशी एकूण 3 लाख रुपये किंमतीची जनावरे टेम्पोत आढळून आली. तसेच चारा व पाण्याची कोणतीही व्यवस्था न करता दाटीवाटीने टेम्पोत भरल्याने या सर्व म्हैसी व वासरांना टेम्पो लागून खरचटल्याचे व जखमा झाल्याचे दिसून आले. नागोठणे पोलिसांनी टेम्पो ताब्यात घेत त्यामधील जनावरांना नागोठणे पोलीस ठाण्याच्या आवारात उतरवले. त्यानंतर पशुधन विकास अधिकारी प्रतीक पवालकर यांच्याकडून त्यांची तपासणी करण्यात आली.

याप्रकरणी टेम्पोचालक मोसिन आसमहमंद कुरेशी याच्या विरोधात नागोठणे पोलीस ठाण्यात गुन्हा दाखल करण्यात आला आहे. अधिक तपास नागोठणे पोलीस ठाण्याचे सपोनि सचिन कुलकर्णी यांच्या मार्गदर्शनाखाली पोलीस उपनिरीक्षक राजहंस नागदिवे हे करीत आहेत. गुरे चोरट्यांच्या विरोधात नागोठणे पोलिसांनी केलेल्या या धडक कारवाईचे सर्वत्र स्वागत करण्यात येत आहे. तसेच मुक्या जनावरांचा जीव वाचविण्यासाठी मोलाचे सहकार्य करणारे नागोठण्यातील गोरक्षक चेतन कामथे, सौरभ जांबेकर व मनीष पवार यांचेही सर्वत्र कौतुक होत आहे.

दरम्यान, गुरेमालक आपली गुरे मोकाट सोडत असल्यानेच गुरे चोरांचे फावत आहे. त्यामुळेच गुरे चोरांच्या टोळ्या जिल्ह्यात सक्रिय झाल्या आहेत. त्यामुळे गुरे मालकांनी आपली गुरे मोकाट सोडू नयेत, असे आवाहन पोलीस खात्याकडून करण्यात आले आहे.