| नाशिक | वृत्तसंस्था |
मद्यसाठा घेवून पळणा-या अज्ञात वाहनाचा पाठलाग करताना राज्य उत्पादन शुल्क विभागाचे सरकारी वाहन उलटल्याचा प्रकार चांदवड-मनमाड रोडवरील हरनुल टोलनाक्याजवळ घडला होता. या अपघातात राज्य उत्पादन शुल्कचा एक कर्मचारी जागीच ठार तर दोघे पोलीस जखमी झाले होते. पोलिसांकडून अज्ञात वाहनाचा शोध सुरू होता. आता या प्रकरणात मुख्य संशयित व अन्य एकास पोलिसांनी ताब्यात घेतले आहे.
सिल्व्हासा येथून नवसारी येथे अवैध दारूसाठा वाहतूक करणाऱ्या वाहनाचा राज्य उत्पादन शुल्क विभाग नाशिकच्या पथकाने लासलगाव येथील पोलीस कर्मचाऱ्यांना सोबत घेत चांदवड-मनमाड रोडवर पाठलाग सुरू केला होता. यावेळी हरनूल शिवारात राज्य उत्पादन शुल्क विभागाच्या वाहनाने अवैध दारू वाहतूक करणाऱ्या वाहनाला अडवण्याचा करण्याचा प्रयत्न केला असता वाहनाने धडक दिल्यामुळे राज्य उत्पादन शुल्क विभागाचे वाहन रस्त्याच्या कडेला शेतात उलटले. या अपघातात चालक कैलास कसबे जागीच ठार झाला. तर तीन कर्मचारी जखमी झाले.
आता याप्रकरणी अपघातातील मुख्य संशयित व अन्य एकास पोलिसांनी ताब्यात घेतले आहे. मुख्य संशयित चांदवड न्यायालयात स्वतःहून हजर झाला. देविदास कांतीलाल पटेल असे संशयिताचे नाव आहे. पोलिसांनी तपासाचा वेग वाढविल्यानंतर संशयित स्वतःहून न्यायालयात हजर झाला. पोलिसांकडून संशयिताची चौकशी सुरू करण्यात आली आहे. यावर कठोर कारवाई केली जाणार आहे. ती गाडी अजूनही मिळाली नाही, पोलीस गाडीचा शोध सुरू आहेत, असे त्यांनी म्हटले आहे.