| मुंबई | प्रतिनिधी |
मुंबईत 18 डिसेंबर रोजी झालेल्या बोट दुर्घटनेत आतापर्यंत 14 जणांचा मृत्यू झाला आहे. गेटवे ऑफ इंडियाहून एलिफंटाकडे जाणार्‍या प्रवासी बोटीला नौदलाच्या स्पीडबोटची धडक बसली, त्यानंतर ही प्रवासी बोट बुडाली. आता नौदलही याबाबत अंतर्गत चौकशी करत आहे. वृत्तानुसार, नौदलाने चौकशीसाठी गुरुवारी चौकशी मंडळाची स्थापना केली आहे. मात्र, ही माहिती आज शुक्रवारी समोर आली.
अपघातानंतर नौदलाने एक निवेदन जारी करून स्पीडबोटचे इंजिन ट्रायल सुरू असल्याचे म्हटले आहे. कॅप्टनचे बोटीवरचे नियंत्रण सुटले आणि ती एका प्रवासी बोटीला धडकली. नौदलाच्या वक्तव्यावर मुंबई पोलिसांनी प्रश्‍न उपस्थित केले आहेत. गेटवे ऑफ इंडियाजवळ ट्रायल रनला कोणी परवानगी दिली, याबाबत पोलिसांनी नौदलाला विचारणा केली आहे. पोलिसांनी महाराष्ट्र मेरीटाईम बोर्डाला पत्र लिहून अपघाताची संपूर्ण माहिती मागितली आहे. पोलिसांनी सांगितले की बोटीची क्षमता 90 प्रवासी होती, ज्यामध्ये 84 प्रवासी आणि 6 क्रू मेंबर्सचा समावेश असू शकतो, तर सुमारे 107 लोक जहाजावर होते. नौदलाच्या बोटीमध्ये 6 लोक होते, त्यापैकी फक्त 2 जणांना वाचवता आले. दोन्ही बोटींवर एकूण 113 लोक होते. नौदलाच्या स्पीडबोटीने धडक दिल्याने जहाज बुडू लागले. सुमारे 25 मिनिटांनंतर नौदलाने जहाजावरील लोकांना वाचवले. याबाबत गुन्हा नोंदविला असून यामध्ये निष्काळजीपणामुळे मृत्यू ओढवून घेणे, इतरांची वैयक्तिक सुरक्षा किंवा जीव धोक्यात घालणे आणि बेपर्वाईने वाहन चालवणे अशी नोंद आहे.
मुंबई बोट दुर्घटनेच्या चौकशीसाठी नौदलाची समिती स्थापन
