रस्त्याच्या खोदकामामुळे मार्गात अडथळा

| नेरळ | वार्ताहर |

माथेरान या पर्यटनस्थळी नागरी वस्तीमधील सांडपाण्याचे व्यवस्थापन करण्यासाठी सांडपाणी व्यवस्थापन प्रकल्प राबविला जात आहे. या प्रकल्पाचे काम करणाऱ्या ठेकेदार कंपनीकडून शहरात पाईप लाईन टाकण्याची कामे सुरु आहेत. मात्र, त्या सर्व कामाचे कागदोपत्री नियोजन नसल्याने शहरातील हॉटेल लाईन भागातील रस्ता एकावेळी दोन्ही बाजूंनी खोदला आहे. दरम्यान, रस्त्याच्या बाजूला हॉटेल्स असलेल्या व्यवसायीक यांनी संताप व्यक्त केला जात आहे.

राज्य सरकारच्या 47 कोटींच्या निधीमधून माथेरान शहरात सांडपाणी व्यवस्थापन प्रकल्प साकारला जात आहे. शासनाच्या 100 टक्के अनुदानावर हा प्रकल्प उभारण्याचे कामे शहरात गेल्या दोन महिन्यापासून कामे सुरु आहेत. त्यात सांडपाणी वाहून नेणारी पाईप लाईन टाकण्याचे काम करण्यावर ठेकेदार कंपनीचा भर असल्याचे दिसून येत आहे. शहरातील हॉटेल लाईन भागातील रस्त्याच्या दोन्ही बाजूंनी खोदकाम केले आहे. एका बाजूला पाण्याची पाईप लाईन लागल्याने ठेकेदाराने रस्त्याची दुसरी बाजू खोदली आहे. रस्त्यावर क्ले मागील वर्षी क्ले पेव्हर ब्लॉक लावण्यात आले आहेत. त्यामुळे अत्यंत चांगल्या स्थितीत असलेल्या रस्त्यावर खोदकाम केल्याने पालिकेचे माजी सभागृह नेते प्रसाद सावंत यांनी संताप व्यक्त केला आहे. स्प्रिंग वूड हेरिटेज हॉटेलपासून रिगल नाका या भागातील रस्ता तयार करण्यासाठी पालिकेने करोडो रुपयांचा निधी खर्च केला आहे, असे असताना पालिकेने त्या भागातून सांडपाणी वाहून नेणारी पाईप लाईन स्त्याच्या बाहेरून टाकण्याचा प्रयत्न करायला हवा होता अशी सूचना सावंत यांनी केली आहे. मात्र, एकाच रस्त्यावर दोन्ही ठिकाणी खोदाई बाजूंनी करण्याचा प्रकार म्हणजे नियोजन शून्य कामाचा नमुना उत्कृष्ट आहे अशी टीका सावंत यांनी केली.

सुरुवातीला पाण्याच्या पाईप लाईनचे बाजूने मलनिःसारण प्रकल्पाच्या वाहिन्या टाकण्याचा प्रयत्न झाला. पण आता जलवाहिन्या असलेल्या ठिकाणी त्याच्या विरुद्ध बाजूने सांडपाणी व्यवस्थापन प्रकल्पाचे पाईप लाईन टाकायच्या सूचना देण्यात आल्या आहेत. स्थानिक नागरिकांना तसे होत असल्याचे दिसल्यास तात्काळ पालिकेला कळवावे.

राहुल इंगळे
मुख्याधिकारी माथेरान नगरपरिषद