मान्सूनपूर्व तयारी बैठकीला अधिकार्‍यांची पाठ

| म्हसळा | वार्ताहर |

सन 2023 ची मान्सूनपूर्व तयारी आणि आपत्ती व्यवस्थापनबाबत तहसीलदार म्हसळा यांच्या अध्यक्षतेखाली मंगळवार, दि. 26 एप्रिल रोजी म्हसळा तालुक्याची आढावा बैठक आयोजित केली होती. दरम्यान, या बैठकीला महसूल विभागाने 22 तालुकास्तरीय कार्यालय प्रमुखांना रितसर आमंत्रण देऊनसुद्धा फक्त पाच कार्यालयीन प्रमुखांनी उपस्थिती लावली व अन्य कार्यालयीन प्रमुखांनी प्रतिनिधींना पाठविणे पसंत केले.

आपत्तीजवळ निगडीत असणार्‍या पुढील मुख्य खातेप्रमुखांनी महसूल विभागाच्या आदेशाकडे पूर्णपणे कानाडोळा केला. त्यामध्ये प्रामुख्याने पुढील विभागांचा समावेश आहे. शाखा अभियंता सा.बां, उप. अभियंता महाराष्ट्र राज्य रस्ते विकास महामंडळ, वैद्यकीय आधिकारी प्रा.आ. केंद्र. म्हसळा, मेंदडी, खामगाव, अधीक्षक ग्रामीण रुग्णालय म्हसळा, पशुधन विकास अधिकारी, शाखा अभियंता. रा. जि. प. शाखा, म्हसळा, वनक्षेत्रपाल सामाजिक वनीकरण म्हसळा, उप अभियंता ग्रा. पा. पुरवठा म्हसळा, भारत संचार निगम, उपअधीक्षक भूमी अभिलेख, दुय्यम निंबधक कार्यालय आशा आपत्तीशी संबंधीत असलेल्या सुमरे 12 कार्यालय प्रमुखांनी महसूल विभागाच्या आदेशाकडे पाठ फिरवली. तर गट शिक्षण अधिकारी यांचा आपत्कालीन परिस्थीत महत्त्वाचा रोल असताना त्यांना बैठकीला आमंत्रण करण्यात आले नाही.

म्हसळा तालुक्यात मागील 20-25 वर्षांपूर्वी पूर, दरडी कोसळणे, वादळ, पिकांचे नुकसान, साथीचे रोग, भूस्खलन असे अनेक प्रकार घडले आहेत, यावेळी सामाजिक संस्था, पत्रकार, दानशूर व्यक्ती यांनी मदत केली आहे.