अलिबाग-रोहा मार्गावर दोन दुचाकी अपघातात एक ठार

। अलिबाग । वार्ताहर ।

अलिबागमधील बेलकडे फाटा येथे शनिवारी (दि. 27) दोन दुचाकींचा एकमेकांना धडकून भीषण अपघात झाला. या अपघातात दुचाकीस्वार जागीच ठार झाला असून एक महिला जखमी झाली आहे.

अलिबाग-रोहा मार्गावरील बेलकडे फाटा येथे शनिवारी (दि. 27) सायंकाळी सातच्या सुमारास दोन दुचाकी एकमेकांना समोरासमोर धडकल्या. हा अपघात इतका भीषण होता की, यात एका दुचाकीवर असलेल्या दोघांपैकी एकाचा जागीच मृत्यू झाला असून एक महिला जखमी झाली आहे. गोविंद झावरे (57) असे मृत व्यक्तीचे नाव असून तो मुळचा रामराज परिसरातील मालाडे येथील रहिवासी आहे. तसेच, योगिता झावरे असे जखमी महिलेचे नाव आहे.

या घटनेची माहिती अलिबाग पोलिसांना मिळताच पोलीस घटनास्थळी हजर झाले. जखमींना उपचारासाठी रुग्णालयात दाखल करण्यात आले आहे. याप्रकरणी मोटार अपघाताची नोंद अलिबाग पोलीस ठाण्यात करण्यात आली असून पुढील तपास पोलीस करत आहेत.