83 कोटींची ऑनलाईन फसवणूक

12 जणांच्या टोळीच्या आवळल्या मुसक्या

| पनवेल | प्रतिनिधी |

राज्यात सर्वत्र राष्ट्रीय सायबर सुरक्षा सप्ताह सुरु असून, याच सप्ताहात प्रतिबंधित ऑनलाईन गेमिंगद्वारे फसवणूक करणारी टोळी नवी मुंबई पोलिसांनी उद्ध्वस्त केली आहे. टोळीतील 12 जणांना अटक करण्यात आली आहे. संशयित आरोपींनी देशभरातील विविध बँकेच्या 886 खात्यांचा वापर केल्याचे निष्पन्न झाले आहे. शिवाय, त्यांच्याविरोधात भारतातील एनसीसीआरपी पोर्टलच्या एकूण 393 तक्रारी उघड झाल्या आहेत. आरोपींनी आतापर्यंत 83 कोटी 97 लाख 48 हजार 278 रूपयांची फसवणूक झाल्याचे प्रथमदर्शी तपासात निष्पन्न झाले आहे.

इसाण उस्मानी मिनहाज शेख, हितेश पुनाराम देवांगन, सुनिल श्रवण देवांगन, तोमेशकुमार मोहीत उईके, राहुल राजु देवांगण, अंकीत रमेश सिंग, अभिषेक संजय सिंग, हरिषकुमार मदनलाल अर्पित संतेन्द्रकुमार सोनवाणी, रजत दिलीप शर्मा, लालबाबु राजेश्वर राम कुमार, कृष्णाअंशु अमित विश्वास, असे अटक करण्यात आलेल्या आरोपींची नावे आहेत.अवैधरित्या गेमिंग ॲप चालविणाऱ्या आरोपींना बँक खाती पुरवणारा आरोपी इसम इम्रान शेख हा सीबीडी रेल्वे स्टेशन येथे येणार असल्याची खात्रीशिर बातमी आर्थिक गुन्हे शाखेचे पोलीस हवालदार राहुल पवार यांना मिळाली होती. त्यांनी आरोपी इम्रान उस्मानी मिनहाज शेख (वय.22, रा. नेरूळ) याला सीबीडी रेल्वे स्टेशन येथून ताब्यात घेतले. त्याच्याकडे चौकशी केल्यानंतर ऑनलाईन गेमिंग फसवणूक केल्याचे कबूल केल्यावर त्याच्या विरोधात सीबीडी बेलापूर पोलीस ठाणे येथे 14 ऑक्टोबरला गुन्हा नोंद करण्यात आला. आरोपी इम्रान उरुमानी मिनहाज शेख याने शासन मान्यता असणाऱ्या ऑनलाईन गेमिंगकरिता बँक खाते उघडून दिल्यास काही रक्कम देण्याचे आमिष नवी मुंबई परिसरातील नागरिकांना दिले होते. तसेच आरोपीने नागरिकांना बँक खाते उघडण्यास लावून बँकेचे पासबुक, एटीएम कार्ड, बँक खात्यास लिंक मोबाईल सिम कार्ड, धनादेश पुस्तिका, इत्यादीचे किट स्वत:कडे घेतले होते. हे किट आरोपी हा डोंबीवली येथे पाठवित असल्याचे तपासात निष्पन्न झाले.

या ठिकाणी पंच व तज्ज्ञांच्या सहायाने मध्यवर्ती कक्ष पोलीस पथकाने धाड टाकली असता तेथे प्रतिबंधित गेमिंग व सायबर फसवणुकीचे ऑनलाईन प्रकार चालू असल्याचे दिसून आले. तेथील ऑनलाईन फसवणुकीकरिता असलेल्या साहित्यासह 5 आरोपींना पंचनामा कारवाई करून अटक करण्यात आलेली आहे. गुन्ह्यातील अटक आरोपीकडे केलेल्या कौशल्यपूर्ण अधिक तपासानंतर अशाच प्रकारे ऑनलाईन सायबर फसवणूक व प्रतिबंधित ऑनलाईन गेमिंग खेळविणारे इतर आरोपीत हे पुणावळे, पिंपरी चिंचवड येथे असल्याचे तपासात निष्पन्न झाले. याठिकाणीदेखील पंच व तज्ज्ञांच्या सहायाने पोलीस पथकाने धाड टाकली असता तेथे प्रतिबंधित गेमिंग व सायबर फसवणुकीचे ऑनलाईन प्रकार चालू असल्याचे दिसून आले. तेथील ऑनलाईन फसवणुकीकरिता असलेल्या साहित्यासह 6 आरोपींना पंचनामा कारवाई करून 16 तारखेला रोजी अटक करण्यात आली आहे. अटक आरोपीकडे असणारे लॅपटॉप व मोबाईल यांचा तांत्रिक तपास केला असता ऑनलाईन प्रतिबंधीत गेमिंग वेबसाईड/ऑप्लिकेशन व ऑनलाईन सायबर फसवणुकीकरिता त्यांनी विविध बँकांच्या 886 खात्यांचा वापर केलेला असल्याचे निष्पन्न झाले आहे. तसेच देशभरातील एन.सी.सी.आर.पी. पोर्टलवर दाखल 393 तकारीमध्ये शेअर मार्केटींग फ्रॉर्ड, जॉब रॅकेटींग, वर्क फॉर्म होम इत्यादी हेडचे गुन्हे उघडकीस आलेले आहेत.

एन.सी.सी.आर.पी. पोर्टलवरील दाखल तक्रारीमध्ये नागरिकांची एकूण 83 कोटी 97 लाख 48 हजार 278 रूपयांची फसवणूक झाल्याचे प्रथमदर्शी तपासात निष्पन्न झाले आहे. सदर गुन्ह्ययाचा पुढील अधिक तपास वरिष्ठ पोलीस निरीक्षक सुनिल शिंदे करीत आहेत.अटक संशयित आरोपी कडून 52 मोबाईल फोन, 7 लॅपटॉप, 99 वेगवेगळ्या बँकांचे डेबिट कार्ड, 64 वेगवेगळ्या बँकांचे धनादेश पुस्तिका, 1 टाटा सफारी कार असा एकूण 18 लाख 5 हजारांचा ऐवज जप्त करण्यात आला आहे.

ही कामगिरी ही सहाय्यक पोलीस आयुक्त अजयकुमार लांडगे यांच्या मार्गदर्शनाखाली वरिष्ठ पोलीस निरीक्षक सुनिल शिंदे, सहाय्यक पोलीस निरीक्षक श्रीनिवास तुंगेनवार, सचिन कोकरे, सतीश भोसले, महेश जाधव, पोलीस उपनिरीक्षक राहुल भदाने, मंगेश वाट, पोलीस हवालदार अनिल यादव, नितीन जगताप, महेश पाटील, संजय राणे, पोलीस नाईक सतीश चव्हाण, निलेश किंद्रे, सचिन टिके, अजय कदम, दिलीप ठाकूर, सोमनाथ काळे, राहुल वाघ, नवनाथ पाटील, ओंकार भालेराव, पूजा वैद्य या पथकाने केली आहे.