पाकिस्तानचा अफगाणिस्तानवर भ्याड हल्ला

400 निष्पापांचा बळी

| नवी दिल्ली | वृत्तसंस्था |

एकीकडे आखातात इराण आणि अमेरिका-इस्रायल भिडले असताना पाकिस्तान आणि अफगाणिस्तानमध्येही जोरदार युद्ध सुरू आहे. दोन्ही बाजूंनी हल्ले-प्रतिहल्ले करण्यात येत आहेत. मंगळवारची पहाट अफगाणिस्तानसाठी भयंकर ठरली. पाकिस्तानने अफगाणिस्तानची राजधानी काबूलमधील एका व्यसनमुक्ती रुग्णालयावर भ्याड हवाईहल्ला केला. या हल्ल्यात 400 जणांचा मृत्यू झाला असून, 250 जण जखमी झाले आहेत.

अफगाणिस्तानचे उपप्रवक्ते हमदुल्ला फितरत यांनी याविषयी माहिती दिली आहे. रात्री नऊ वाजताच्या सुमारास पाकिस्तानने एका व्यसनमुक्ती रुग्णालयावर हल्ले केले. 2000 हजार खाटांचे हे मोठे रुग्णालय या हल्ल्यात उद्ध्वस्त झाले. उपचार सुरू असलेल्या अनेक रुग्णांचा यात मृत्यू झाला आहे. तालिबानचे मुख्य प्रवक्ते जबिहुल्ला मुजाहिद यांनी या हल्ल्याचा तीव्र निषेध केला आहे. ‌‘पाकिस्तानी लष्करी राजवटीने पुन्हा एकदा हवाई हद्दीचे उल्लंघन करून रुग्णालयांवर हल्ले केले आहेत. हा मानवतेविरुद्धचा गुन्हा आहे,’ अशी जळजळीत टीका त्यांनी केली आहे. दरम्यान, पाकिस्तानने हॉस्पिटलवर हल्ला केल्याचे वृत्त नाकारले आहे. या आरोपांना कसलाही आधार नसल्याचे माहिती प्रसारण मंत्री अताउल्ला तरार यांनी म्हटले आहे. आपण फक्त तालिबानच्या लष्करी तळांना, दारूगोळ्याच्या साठ्यांना लक्ष्य केल्याचा दावा त्यांनी केला आहे.