नवी मुंबई पोलीस आयुक्तालयाची कामगिरी

लाखो किमतीचे मोबाईल केले परत

| पनवेल | प्रतिनिधी |

नवी मुंबई पोलीस आयुक्तालयातील गुन्हे शाखा कक्ष 2 यांनी गहाळ झालेले 8 लाख 92 हजार 574 किमतीचे 53 मोबाईल मुळ मालकांना परत केले आहेत. त्यामुळे मोबाईल मालकांनी नवी मुंबई पोलिसांचे कौतुक करत समाधान व्यक्त केले आहे.

नवी मुंबई पोलीस आयुक्तालयांतर्गत असणाऱ्या पोलीस ठाण्याकडे विविध व्यक्तींककडून मोबाईल गहाळ झालेबाबतच्या तक्रारी नोंद करण्यात येतात. ही तक्रार नोंद करण्यात आल्यानंतर पोलीस ठाण्याकडून गहाळ झालेल्या मोबाईलची माहिती ‌‘सीइआयआर’ या शासकीय पोर्टलवर भरण्यात येते. या पोर्टलवर गहाळ झालेल्या मोबाईल फोनची माहिती गुन्हेशाखा प्राप्त करते. ‌‘सीइआयआर’ या शासकीय पोर्टलच्या सहाय्याने व तांत्रिक तपास करुन गहाळ मोबाईलमध्ये नवीन मोबाईल नंबर निष्पन्न झाल्यानंतर महाराष्ट्र तसेच विविध राज्यातील व्यक्तींच्या संबंधित मोबाईल नंबरवर संपर्क करुन मोबाईल धारकाला मोबाईलचे वस्तुस्थितीबाबतची माहिती देऊन त्यांच्याकडुन ते मोबाईल फोन प्राप्त केले जातात. त्यानुसार सप्टेंबर ते नोव्हेंबर या कालावधीत गहाळ झालेले 8 लाख 92 हजार 574 किमतीचे 53 मोबाईल फोन गुन्हे शाखेकडून प्राप्त झाले असून ते मुळ मालकांना परत देण्यात आले आहेत.

दरम्यान, गहाळ झालेले मोबाईल फोन परत मिळाल्याने मोबाईल मालकांनी त्याबाबत आनंद व्यक्त करुन नवी मुंबई पोलीसांचे कौतुक केले. तसेच, भविष्यात देखील पोलीसांनी अशीच चांगली कामगिरी करावी, असे मत व्यक्त केले. ही उल्लेखनीय कामगिरी नवी मुंबई पोलीस आयुक्त मिलिंद भारंबे, अपर पोलीस आयुक्त दीपक साकोरे, पोलीस उप आयुक्त सचिन गुंजाळ, सहाय्यक पोलीस आयुक्त अजयकुमार लांडगे यांच्या मार्गदर्शनाखाली व वपोनि अनिल पाटील यांच्या देखरेखीखाली पोलीस हवालदार सुनिता चंदगीर, पोलीस शिपाई संतोष तांदळे व स्नेहा गायकवाड यांनी केली आहे.