सुरू केव्हा होणार; पर्यटकांचा सवाल
। माथेरान । वार्ताहर ।
पर्यटकांची फसवणूक रोखण्याकरिता नगरपालिकेमार्फत प्रीपेड सेवा देण्याच्या हालचाली सुरू झाल्या होत्या, तसेच केंद्र उभारणीसाठी केबिनही बनविल्या गेल्या, मात्र आजतागायत प्रीपेड सेवा केंद्र सुरू झाले नाहीत. तर ते केव्हा सुरू होणार, असा सवाल पर्यटकांकडून विचारला जात आहे.
माथेरान हे रायगड जिल्ह्यातील सुप्रसिद्ध महत्त्वाचे थंड हवेचे ठिकाण आहे. लाखो पर्यटक या पर्यटनस्थळाला भेट देत असतात. काही महिन्यांपासून फसवणुकीचे आणि दिशाभूल करण्याचे प्रकार वाढू लागल्याने नगरपालिकेने माथेरानचे प्रवेशद्वार दस्तुरी येथे प्रीपेड सेवा केंद्र सुरू करण्यासाठी घोडेवाले, रिक्षावाले, कुली यांच्यासाठी केबिन तयार केली. दरम्यान माथेरानमधील पोलीस ठाणे, वन विभाग, महसूल विभाग यांनी पोलीस ठाण्याच्या प्रांगणात घोडेवाल्यांसोबत चर्चा करून लवकरच प्रीपेड सेवा केंद्र सुरू केले जाईल, असे नगरपालिकेतर्फे सांगण्यात आले. सर्वांनी त्याचे स्वागत केले मात्र अजूनही हे केंद्र अजूनही सुरू केले नसल्याने पर्यटकांनी नाराजी व्यक्त करत ही सेवा कधी सुरू होणार, असा सवाल केला आहे.
माथेरानचे प्रवेशद्वार दस्तुरीनाका येथे आलो असता घोडेवाले, रिक्षावाले, कुली, रूमवाले यांनी गराडा घालून सतावत आहेत. जर प्रीपेड सेवा सुरू असती तर आम्हाला इतका त्रास सहन करावा लागला नसता, त्यामुळे नगरपालिका ही प्रीपेड सेवा कधी सुरू करणार?
शब्बीर कुरेशी, पर्यटक, मुंबई