| उरण | प्रतिनिधी |
नवी उमेद, नवे ध्येय आणि जनतेच्या सेवेसाठी नव्या वळणावर उभा राहिलेला महत्त्वाचा दिवस महाविकास आघाडीच्या घटक पक्षाच्या कार्यालयाचे उद्घाटन मोठ्या उत्साहात आणि जनतेच्या मोठ्या उपस्थितीत पार पडले. परिसरातील कार्यकर्ते, नागरिक आणि पदाधिकारी यांच्या पारंपरिक मंगल शुभेच्छांसह कार्यालयाचा शुभारंभ माजी आमदार बाळाराम पाटील यांच्या हस्ते करण्यात आला. भविष्यातील राजकीय दिशा आणि लोकांसाठीच्या बांधिलकीचे प्रतीक ठरणारा हा क्षण, उभ्या असलेल्या प्रत्येकाच्या मनात एक विशेष आशावाद रोवून गेला.
उद्घाटनानंतर माजी आमदार मनोहर भोईर यांनी थोडक्यात पण हृदयाला भिडणारे शब्द बोलले. लोकांचा विश्वास, जनतेच्या प्रश्नांवर तत्पर प्रतिसाद आणि विकासाच्या कामात पारदर्शकता या तत्त्वांनुसार पक्ष कार्यरत असल्याचे त्यांनी सांगितले. समाजातील सर्व घटकांना जोडून घेण्याची आणि प्रत्येक नागरिकापर्यंत पोहोचण्याची गरज त्यांनी अधोरेखित केली. ओंकार घरत यांच्याशी झालेल्या थोड्याशा अनौपचारिक संवादात भविष्यातील कल्पना आणि लोकहिताचे विचार अधिक स्पष्ट झाले.
जर निवडून आलो तर महिलांची सुरक्षा हे माझे पहिले प्राधान्य असेल, असे सांगताना त्यांच्या आवाजात आत्मविश्वास आणि संवेदनशीलता दोन्ही जाणवत होते. महिलांसाठी सुरक्षित वातावरण, सार्वजनिक स्वच्छतागृहाची उभारणी आणि सुधारणे, तसेच नागरिकांच्या नाळेशी जोडलेल्या विमला तलावाच्या स्वच्छता मोहिमेवर त्यांनी विशेष भर दिला. तलाव स्वच्छता मोहिमेबाबत ते म्हणाले, विमला तलाव हा केवळ पाण्याचा साठा नाही, भावनांचा आणि सांस्कृतिक वारशाचा भाग आहे. त्याला नवजीवन देणे ही आपली सर्वांची सामूहिक जबाबदारी आहे. या वाक्यानंतर उपस्थित नागरिकांमध्ये टाळ्यांचा गजर झाला जणू त्यांच्या मनातल्या इच्छांना शब्द मिळाले होते. या कार्यक्रमात अनेक स्थानिक नागरिक उपस्थित होते. प्रत्येकाच्या चेहऱ्यावर उत्सुकता, बदलाची आशा आणि विकासाच्या नव्या दिशेची प्रतीक्षा दिसत होती. पदाधिकारी आणि कार्यकर्त्यांनी कार्यालयाच्या माध्यमातून अधिक चांगल्या संवादाची आणि त्वरित उत्तरांची हमी देत जनतेशी सहित्यपूर्ण नातं जोडण्याचा संकल्प व्यक्त केला.
जनसंपर्क कार्यालयाचे बाळाराम पाटील यांच्या हस्ते उद्घाटन
