ईडीच्या संचालकपदी राहूल नवीन

सर्वोच्च न्यायालयाच्या दणक्याने संजय मिश्रा पदावरून बाजूला

। नवी दिल्ली । वृत्तसंस्था ।

केंद्र सरकारने बुधवारी, 14 ऑगस्ट रोजी 1993 बॅचचे अधिकारी राहुल नवीन यांची अंमलबजावणी संचालनालयाचे अर्थात ईडी पूर्णवेळ संचालक म्हणून नियुक्ती केली. ते संजय कुमार मिश्रा यांची जागा घेतील. बिहारचे रहिवासी असलेले राहुल नवीन सध्या ईडीच्या कार्यकारी संचालक पदावर होते. मंत्रिमंडळाच्या नियुक्ती समितीने (एसीसी) जारी केलेल्या आदेशात राहुल यांचा कार्यकाळ 2 वर्षांसाठी किंवा पुढील आदेशापर्यंत असेल, असे म्हटले आहे. ते 2019 मध्ये विशेष संचालक म्हणून ईडीमध्ये रुजू झाले. 15 सप्टेंबर 2023 रोजी संजय कुमार मिश्रा यांचा कार्यकाळ संपल्यानंतर राहुल यांची कार्यकारी संचालक म्हणून नियुक्ती करण्यात आली. आंतरराष्ट्रीय कर तज्ज्ञ राहुल नवीन यांच्या कार्यकाळात दिल्लीचे मुख्यमंत्री अरविंद केजरीवाल आणि झारखंडचे मुख्यमंत्री हेमंत सोरेन यांना मनी लाँड्रिंगशी संबंधित प्रकरणांमध्ये अटक करण्यात आली आहे.

संजय कुमार मिश्रा यांचा कार्यकाळ
ईडीचे संजय कुमार मिश्रा यांचा कार्यकाळ 15 सप्टेंबर 2023 रोजी संपला होता. ते सुमारे 4 वर्षे 10 महिने ईडीचे संचालक होते. संजय गेल्या वर्षी 18 नोव्हेंबरला निवृत्त होणार होते. केंद्राने एका अध्यादेशाद्वारे त्यांचा कार्यकाळ तिसर्‍यांदा वाढवला होता, तर संजय मिश्रा यांचा कार्यकाळ दुसर्‍यांदा वाढवू नये, असे न्यायालयाने आधीच सांगितले होते. सर्वोच्च न्यायालयाच्या आदेशानंतरही मिश्रा 31 जुलैपर्यंत पदावर होते. याच काळात सरकारला नवीन प्रमुखाची नियुक्ती करावी लागली.