जिल्ह्यात रमजान ईद उत्साहात

| रायगड | जिल्हा प्रतिनिधी |

रायगड जिल्ह्यात रमजान ईद मोठ्या उत्साहात आणि भक्तीभावाने साजरी करण्यात आली. महिनाभर कडक रोजा (उपवास) केल्यानंतर मुस्लिम बांधवांनी शनिवारी (दि.21) ईद साजरी करत एकात्मतेचा संदेश दिला. जिल्ह्यातील तब्बल 252 ठिकाणी नमाज अदा करण्यात आला. यामध्ये 232 मशिदी आणि 21 दर्गे येथे हजारो मुस्लिम बांधव मोठ्या संख्येने सहभागी झाले होते. सकाळी नवीन कपडे परिधान करून सर्वांनी सामूहिक नमाज अदा केली आणि एकमेकांना गळाभेट देत ईदच्या शुभेच्छा दिल्या.

रमजान महिन्यात उपवास केल्यानंतर चंद्रदर्शन झाल्यावर ईद साजरी करण्यास सुरुवात झाली. विशेष म्हणजे, ज्येष्ठ नागरिकांसह लहान मुलांनीही रोजा पाळून धार्मिक परंपरेचे पालन केले. यामुळे संपूर्ण मुस्लिम समाजात वेगळाच उत्साह पाहायला मिळाला. ईदनिमित्त घराघरांत शीरखुर्मा, बिर्याणी, पुलाव यांसारख्या पारंपरिक पदार्थांची रेलचेल होती. तसेच विविध संस्था आणि संघटनांकडूनही मुस्लिम बांधवांना शुभेच्छा देण्यात आल्या. दरम्यान, कायदा व सुव्यवस्था राखण्यासाठी रायगड पोलिसांकडून विशेष बंदोबस्त ठेवण्यात आला होता. अनेक ठिकाणी पोलिसांनी भेट देत मुस्लिम बांधवांना ईदच्या शुभेच्छा दिल्या. या सणाच्या निमित्ताने जिल्ह्यात सर्वत्र बंधुभाव, शांतता आणि सामाजिक ऐक्याचे दर्शन घडले.