उरण पंचायत समितीवर लाल बावटा

सभापतीपदी शेकापचे महेश म्हात्रे बिनविरोध; उपसभापतीपदी परेश ठाकूर यांची निवड

| चिरनेर | प्रतिनिधी |

उरण पंचायत समितीच्या सभापती व उपसभापती पदाची निवड बुधवारी (दि.11) उरण पंचायत समितीच्या कार्यालयात पीठासन अधिकारी अधिकारी तहसीलदार डॉ. उद्धव कदम यांच्या अध्यक्षतेखाली पार पडली. यावेळी महाविकास आघाडीच्या शेतकरी कामगार पक्षाचे महेश म्हात्रे यांची सभापतीपदी बिनविरोध निवड करण्यात आली. तर, उपसभापती महाविकास आघाडीचे शिवसेनेचे परेश ठाकूर यांचीदेखील बिनविरोध निवड करण्यात आली. त्यामुळे महाविकास आघाडीच्या कार्यकर्त्यांमध्ये चैतन्याचे वातावरण दिसून आले.

महाविकास आघाडीच्या निवडून आलेल्या दोन्ही सदस्यांची सभापतीपदी व उपसभापतीपदी निवड झाल्यामुळे महाविकास आघाडीच्या कार्यकर्त्यांनी जल्लोष केला. यावेळी नवनिर्वाचित सभापती महेश म्हात्रे व उपसभापती परेश ठाकूर यांना शुभेच्छा देण्यासाठी शेकापचे ज्येष्ठ नेते तथा माजी आ. बाळाराम पाटील, माजी आ. मनोहर भोईर, उरणच्या नगराध्यक्षा भावना घाणेकर, जिल्हा परिषद सदस्य अविनाश ठाकूर, माजी पंचायत समिती सभापती नितीन कोळी, शेकापचे नरेश घरत, माजी उपसभापती रमाकांत पाटील, शेकाप तालुका चिटणीस रवी घरत, शेकापचे सहचिटणीस सुरेश पाटील, जिल्हा चिटणीस सदस्य संजय गावंड, शिवसेना तालुका प्रमुख संतोष ठाकूर, उपतालुकाप्रमुख बी.एन. डाकी, नगरसेविका निहादा ठाकूर, लता पाटील, शेखर पाटील, शुभांगी पाटील, तुळशीदास पाटील यांच्यासह महाविकास आघाडीचे पदाधिकारी व कार्यकर्ते उपस्थित होते. यावेळी जल्लोष करत मोठ्या उत्साहात उरण शहरात मिरवणूक काढण्यात आली होती.