| पनवेल | विशेष प्रतिनिधी |
सिडको आणि पनवेल महानगरपालिका क्षेत्रातील वाढती लोकसंख्या, नवीन बांधकामे आणि त्यातून निर्माण होणारी पाण्याची वाढती गरज लक्षात घेता, सिडको व पनवेल महानगरपालिकेने पाणीपुरवठ्याबाबत श्वेतपत्रिका जाहीर करावी, अशी मागणी शिवसेना (उद्धव बाळासाहेब ठाकरे) पक्षाचे उपजिल्हाप्रमुख भरत पाटील यांनी केली आहे. याबाबत त्यांनी सिडकोचे व्यवस्थापकीय संचालक आणि पनवेल महानगरपालिका आयुक्तांना निवेदन दिले आहे.
सिडको व पनवेल महापालिका क्षेत्रातील नागरिकांना पावसाळ्यासारख्या मुबलक पाण्याच्या काळातही पाणीटंचाईला सामोरे जावे लागत असल्याचा मुद्दा पाटील यांनी उपस्थित केला आहे. शहरातील जलस्रोतांची सध्याची स्थिती काय आहे, किती पाणी उपलब्ध आहे, त्याचे वितरण कशा पद्धतीने केले जाते, गळतीमुळे किती पाण्याची नासाडी होते आणि भविष्यातील पाणीटंचाई टाळण्यासाठी कोणत्या उपाययोजना करण्यात येत आहेत, याची स्पष्ट माहिती नागरिकांसमोर येणे आवश्यक असल्याचे त्यांनी म्हटले आहे. सिडको व पनवेल परिसरातील उपलब्ध पाणीपुरवठ्याची क्षमता लक्षात घेऊनच नवीन बांधकामांना परवानगी देण्यात यावी, अशी मागणीही करण्यात आली आहे. सध्या अस्तित्वात असलेल्या इमारती आणि गृहसंकुलांनाच पुरेसा पाणीपुरवठा होत नसताना भविष्यात मोठ्या प्रमाणावर वाढणाऱ्या लोकसंख्येला पाणी कसे उपलब्ध करून दिले जाणार, याचे नियोजन आतापासून करणे गरजेचे आहे. याबाबत सिडको व महापालिका प्रशासनाने पारदर्शक भूमिका स्पष्ट करावी, अशी मागणी पाटील यांनी केली आहे.
पाणीपुरवठ्याची श्वेतपत्रिका जाहीर करा: भरत पाटील
