रोहन तटकरेंचे जल्लोषात स्वागत

सैन्य दलातील सेवेनंतर मायदेशी भव्य मिरवणूक

| रायगड | जिल्हा प्रतिनिधी |

अलिबाग तालुक्यातील गवळीवाडी येथील रोहन तटकरे यांनी भारतीय सैन्य दलातील सेवा पूर्ण केली. देशसेवेतून निवृत्त होऊन ते मायदेशी परतले. सैन्य दलात हवालदार म्हणून कार्यरत असलेले रोहन ओमप्रकाश तटकरे यांचे गावामध्ये ढोल-ताशांच्या गजरात आणि भव्य मिरवणुकीने जल्लोषात स्वागत करण्यात आले. ग्रामस्थांनी फुलांची उधळण करत व तिरंगा झेंडा फडकवत सन्मान केला.

अलिबाग तालुक्यातील वेश्वी ग्रामपंचायत हद्दीतील गवळीवाडी येथील एका गरीब कुटुंबात जन्मलेले रोहन यांनी पदवी शिक्षण पूर्ण केले. त्यानंतर भारतीय सैन्य दलात सामील होण्याचा निर्णय त्यांनी घेतला. त्यासाठी त्यांनी जिल्हा क्रीडा संकुल मैदानात जोरदार सराव केला. 2006 साली अलिबागमध्ये झालेल्या सैन्य भरतीमध्ये त्यांची निवड झाली. भारतीय सैन्य दलात सामील होण्याचे त्यांचे स्वप्न 29 जून 2006 ला पूर्ण झाले.

बेळगाव येथील मराठा रेजिमेंटल सेंटरमध्ये त्यांनी प्रक्षिण घेतले. त्यानंतर ते देशसेवेसाठी जम्मू काश्मीर येथे रुजू झाले. त्याठिकाणी त्यांनी दहा वर्षे सेवा केला. त्यानंतर बेळगाव येथील मराठा लाईट इन्फन्ट्री रेजिमेंटल सेंटरमध्ये तीन वर्षे सेवा केली. त्याठिकाणी शस्त्रधारी प्रशिक्षणक म्हणून काम केले. 2021 मध्ये इंदोर (मध्य प्रदेश) येथे केलेल्या उत्कृष्ट कामगिरीबद्दल त्यांना उत्कृष्ट शूटर म्हणून सन्मानित करण्यात आले. दोन वर्षे सियाचीन तसेच कारगिल येथे झालेल्या ऑपरेशन सिंदूरमध्येदेखील त्यांचा सहभाग होता. वीस वर्षे देश सेवा केल्यानंतर ते एक एप्रिलमध्ये सेवानिवृत्त झाले. देशसेवेनंतर मायदेशी परतणाऱ्या जवानाचे क्षण भावूक होते. गावातील प्रवेशद्वाराजवळ आल्यावर रोहन तटकरे, त्यांची आई अश्विनी, पत्नी विनिता आणि मुली यांची रथातून ढोल-ताशांच्या गजरात पुष्पवृष्टी करत गवळवाडी गावातून घरापर्यंत मिरवणूक काढण्यात आली. महिलांनी औक्षण केले आणि फटाक्यांची आतषबाजी करत ग्रामस्थांनी आनंदोत्सव साजरा केला.