अटल सेतूवर भरधाव कारच्या धडकेत खलाशाचा मृत्यू

। नवी मुंबई । प्रतिनिधी ।

ससून डॉक बंदर येथे मासे विकून मुरुडला परतत असलेल्या खलाशांच्या पिकअप वाहनाला भरधाव कारने मागून जोरदार धडक दिल्याने एका खलाशाचा मृत्यू झाला, तर वाहनचालक गंभीर जखमी झाला आहे. ही घटना गुरुवारी (दि.2) सकाळी अटल सेतूवर घडली. उलवे पोलिसांनी तातडीने कारचालकाविरुद्ध गुन्हा दाखल करून पुढील कारवाई सुरू केली आहे. मृत खलाशाचे नाव सुहास जठारी (42) असे असून, तो मुरुड येथील कोळीवाडा भागात राहात होता. पिकअप वाहनाचा चालक अभिषेक शरद जावळेकर गंभीर जखमी असून, सध्या त्यांच्यावर उपचार सुरू आहेत. अपघाताची माहिती मिळताच पोलीस घटनास्थळी दाखल झाले आणि कारचालकाला ताब्यात घेतले.

मिळालेल्या माहितीनुसार, ‘एक्विरा मौली’ ही मासेमारी नौका चालवणारे जठारी आणि त्यांचे सहकारी यांनी 2 ऑक्टोबर रोजी पकडलेले मासे विकण्यासाठी महिंद्रा पिकअपद्वारे मुंबईतील ससून डॉक येथे जाण्याचा निर्णय घेतला होता. मासळीची विक्री आटोपून ते गुरुवारी सकाळी सुमारे साडेसहाच्या सुमारास मुरुडकडे परतत होते. यावेळी अटल सेतूवरील शेलघार टोल पॉइंटजवळ त्यांच्या पिकअप वाहनाला मागून भरधाव वेगात येणाऱ्या व्होक्सवॅगन कारने जोरदार धडक दिली. धडकेच्या तीव्रतेमुळे पिकअपच्या मागील बाजूस बसलेले सुहास जठारी यांचे संतुलन बिघडले आणि ते रस्त्यावर पडले. या अपघातात त्यांच्या डोक्याला गंभीर दुखापत झाली. या घटनेनंतर टोल कर्मचाऱ्यांनी जठारी आणि जखमी चालक अभिषेक जावळेकर यांना तात्काळ एमजीएम रुग्णालयात दाखल केले. मात्र, डॉक्टरांनी तपासणीअंती जठारी यांना मृत घोषित केले, तर जावळेकर यांच्यावर उपचार सुरू करण्यात आले. प्राथमिक तपासात असे स्पष्ट झाले आहे की व्होक्सवॅगन कार चालकाने निष्काळजीपणे व वेगमर्यादा न पाळता वाहन चालविल्यामुळे हा अपघात घडला. त्याच्याविरुद्ध गुन्हा दाखल करण्यात आला असून, पुढील तपास सुरू आहे.