ऐन गणेशोत्सवात सावित्री नदी प्रदूषित

रासायनिक सांडपाणी सोडल्याचा आरोप; महाड शहर विकास मंच आक्रमक

| महाड | प्रतिनिधी |

महाड एमआयडीसी परिसरातील औद्योगिक प्रदूषणाबरोबरच सावित्री नदीच्या प्रदूषणाचा गंभीर प्रश्न पुन्हा ऐरणीवर आला आहे. या नदीमध्ये प्रक्रिया न केलेले रासायनिक सांडपाणी सोडले जात असल्याचा आरोप महाड शहर विकास मंचाने केला आहे. तसेच, मोठ्या प्रमाणात मासे व इतर जलचर मृत्युमुखी पडत असल्याचे देखील मंचाने प्रशासनाच्या निदर्शनास आणून दिले आहे. त्यातच गणेशोत्सव काळात या नदीपात्रात गणपतींचे मोठ्या प्रमाणात विसर्जन केले जाते. मात्र, या प्रदुषित पाण्यात बाप्पाचे विसर्जन केल्यास मानवी आरोग्याला धोका निर्माण होण्याची शक्यता वर्तविली जात आहे.

महाड एमआयडीसीमध्ये औद्योगिक सांडपाण्यावर प्रक्रिया करण्यासाठी सीईटीपी प्रकल्प कार्यान्वित आहे. तरी देखील काही आस्थापनांकडून रात्रीच्या वेळी अथवा छुप्या मार्गाने प्रक्रिया न केलेले सांडपाणी सावित्री नदीत सोडले जात आहे, असा गंभीर आरोप महाड शहर विकास मंचाकडून करण्यात आला आहे. या प्रकारामुळे नदीचे पाणी दूषित होत असून, जलचरांच्या अस्तित्वावर मोठा परिणाम होत आहे. तसेच, सावित्री नदीवर परिसरातील कोळी बांधव आणि मच्छिमारांचा रोजगार मोठ्या प्रमाणात अवलंबून आहे. मात्र, नदीतील प्रदूषणामुळे मासेमारी व्यवसायावर परिणाम होण्याबरोबरच दूषित पाण्यातील मासे मानवी आहारात गेल्यास नागरिकांच्या आरोग्यालाही धोका निर्माण होऊ शकतो, अशी चिंता मंचातर्फे व्यक्त करण्यात आली आहे.

या प्रकरणी महाराष्ट्र प्रदूषण नियंत्रण मंडळाने तातडीने नदीची पाहणी करून पाण्याचे नमुने तपासावेत, मृत जलचरांची पाहणी करावी. तसेच, नियमांचे उल्लंघन करणाऱ्या आस्थापनांचा शोध घ्यावा, अशी मागणी करण्यात आली आहे. दोषी आस्थापना आढळल्यास त्यांच्यावर पर्यावरणीय कायद्यानुसार कठोर कारवाई करून आवश्यक असल्यास उत्पादन बंद करण्याचे आदेश द्यावेत, अशीही मागणी करण्यात आली आहे. तसेच, प्रदूषणाच्या या प्रकाराकडे सातत्याने दुर्लक्ष होत असल्यास प्रशासनाच्या कार्यपद्धतीबाबत नागरिकांमध्ये नाराजी आणि अविश्वास निर्माण होत असल्याचे मंचाने म्हटले आहे. या प्रकरणामुळे ऐन गणपती उत्सवाच्या काळात महाड एमआयडीसीतील औद्योगिक प्रदूषणाचा प्रश्न पुन्हा एकदा चर्चेत आला असून, प्रशासन आता कोणती भूमिका घेते आणि नदी प्रदूषणाला जबाबदार घटकांवर काय कारवाई केली जाते, याकडे नागरिकांचे लक्ष लागले आहे.

कारवाईची मागणी
तहसीलदार कार्यालयाने या प्रकरणाची गंभीर दखल घेऊन संबंधित दोषी आस्थापनांवर दंडात्मक व कायदेशीर कारवाई करण्याचे निर्देश द्यावेत. तसेच, महाड नगरपरिषदेनेही सार्वजनिक आरोग्य आणि पर्यावरणाच्या दृष्टीने या प्रकरणात पुढाकार घेऊन पोलीस ठाणे तसेच महाराष्ट्र प्रदूषण नियंत्रण मंडळाकडे अधिकृत तक्रार दाखल करावी, अशी मागणी महाड शहर विकास मंचातर्फे मुख्याधिकारी धनंजय कोळेकर यांच्याकडे करण्यात आली आहे.

मंत्रालयात तक्रार करण्याचा इशारा
सावित्री नदीचे प्रदूषण, जलचरांचा मृत्यू आणि नागरिकांच्या आरोग्याचा प्रश्न अत्यंत गंभीर असून प्रशासनाने तातडीने ठोस उपाययोजना कराव्यात, अशी भूमिका महाड शहर विकास मंचाने घेतली आहे. महाराष्ट्र प्रदूषण नियंत्रण मंडळाने या तक्रारीची तातडीने दखल घेऊन कारवाई केली नाही, तर याप्रकरणी मंत्रालय स्तरावर गंभीर तक्रार करण्यात येईल, असा इशाराही मंचाच्यावतीने देण्यात आला आहे.