शाळांची हजेरी होणार डिजिटल पद्धतीने

राज्यभर व्हीएसके प्रणाली लागू

| रत्नागिरी | प्रतिनिधी |

सर्व शाळांमध्ये आता विद्यार्थी आणि शिक्षकांची हजेरी विद्या समीक्षा केंद्र (व्हीएसके) प्रणालीवरच नोंदवावी लागणार आहे. केंद्र शासनाच्या धोरणानुसार प्राथमिक आणि माध्यमिक व उच्च माध्यमिक शिक्षण संचालनालयाने शाळांना विस्तृत मार्गदर्शक सुचना दिल्या आहेत. डिजिटल पद्धतीने उपस्थिती नोंदवण्याचा निर्णय यावर्षीपासूनच लागू केला आहे. केंद्र शासनाच्या उपक्रमाचा एक भाग म्हणून व्हीएसके प्रणाली राज्यभर लागू करण्यात आली आहे. विद्याथ्यांच्या दैनंदिन उपस्थितीवर थेट नियंत्रण ठेवणे, बास्तविक उपस्थितीचे विश्लेषण करणे आणि शाळा पातळीवरील प्रशासकीय पारदर्शकता वाढवणे या उद्दिष्टासाठी ही प्रणाली सक्षम ठरणार असल्याचे शिक्षण विभागाचे म्हणणे आहे. आता राज्यातील सर्व शाळांनी ऑनलाईन हजेरी प्रणाली स्वीकारण्याची तयारी सुरू करण्याच्या सूचना दिल्या आहेत.

संचालनालयाने एक परिपत्रक काढत नव्या सूचनांनुसार प्रत्येक शाळेने व्हीएसके प्रणालीचा दैनंदिन वापर करुन विद्यार्थ्यांची तसेच शिक्षकांची उपस्थिती नोंदवणे बंधनकारक आहे. उपस्थिती नोंदीत कोणतीही तांत्रिक त्रुटी किंवा विलंब होऊ नये यासाठी शिक्षकांनी गुगल प्ले स्टोअरवरील महास्टुडंट ॲप हे अधिकृत ॲप डाऊनलोड करुन त्यावर शाळेचा बूडायस क्रमांक व प्राथमिक माहिती नोंदवावी असे कळवण्यात आले आहे.

ॲपमध्ये शाळेची माहिती प्रदर्शित झाल्यानंतर ती अचूक असल्याची खातरजमा करून पुढील टप्पा पूर्ण करावयाचा आहे. त्यानंतर संबधित वर्ग शिक्षकांनी स्वतः चा शालार्थ आयडी प्रविष्ट करुन शालार्थातील माहिती योग्य असल्याची पडताळणी करणे आवश्यक असल्याचेही या परिपत्रकात म्हटले आहे. शाळांमधील हजेरी नोंदीची अंमलबजावणी सुरळीत व्हावी, यासाठी केंद्रप्रमुखांनी दररोज आढावा घेणे बंधनकारक असल्याचे आदेशात स्पष्ट केले आहे. तसेच, मुख्याध्यापक किंवा प्रभारी मुख्याध्यापकांसाठी ॲपमध्ये स्वतंत्र शिक्षक उपस्थिती मॉडयूल असून, त्याद्वारे सर्व शिक्षकांची हजेरी चिन्हांकीत करावी लागणार आहे.