। हमरापूर । प्रतिनिधी ।
पेण रेल्वे स्थानकातून पेण-पनवेल मेमु ही प्रवासी शटल रेल्वे सेवा पुन्हा पूर्ववत करण्यासाठी तसेच पेण व रोहा स्थानकातून इएमयु किंवा मेमु ही छत्रपती शिवाजी टर्मिनल व दादर, ठाणे, कल्याण, दिवा, वसई रोड व डहाणू रोड ही प्रवासी रेल्वे सेवा तातडीने सुरू करण्याचे निवेदन मध्य रेल्वे प्रशासनाला दिले आहे. या निवेदनातून समस्त पेणकरांनी तातडीने ही सेवा सुरू न केल्यास दि.11 नोव्हेंबर रोजी छत्रपती शिवाजी महाराज टर्मिनल येथील मुख्य कार्यालयाच्या प्रांगणात सामूहिक आत्मदहन करण्याचा इशारा मी पेणकर, आम्ही पेणकर शाश्वत समितीचे अध्यक्ष योगेश म्हात्रे यांनी दिला आहे.
पेणकरांनी आंदोलने, उपोषणे केल्यानंतर दि.11 नोव्हेंबर 2018 रोजी पेण-पनवेल शटल सेवा सुरू करण्यात आली, मात्र त्यानंतर कोरोनाच्या पार्श्वभूमीवर देशातील सर्वच रेल्वे सेवा बंद करण्याचा निर्णय केंद्र शासनाने घेतल्यानंतर ही सेवा देखील बंद झाली होती, मात्र आता सर्व व्यवहार, सर्व सेवा पूर्वपदावर येत असल्याने आता ही बंद ठेवण्यात आलेली शटल सेवा देखील पुन्हा सुरू करण्यात यावी. याचबरोबर पेण स्थानकातून पेण-पनवेल-दिवा व वसई रोड व डहाणू रोड ही प्रवासी मेमु रेल्वे सेवा देखील पुन्हा सुरू व्हावी, पेण- ठाणे ही प्रवासी रेल्वे सेवा शनिवार व रविवारी देखील उपलब्ध व्हावी, अलिबाग रेल्वे मार्ग प्रवासी मार्गासाठी सुरू करण्यात यावा, रोजच्या जलद सेमी व फास्ट, सुपर फास्ट सर्व रेल्वे गाड्यांना पेण स्थानकात थांबा मिळावा आदी मागण्या पेणकर समितीने मध्य रेल्वेकडे निवेदनाद्वारे केल्या आहेत. या मागण्या मान्य न केल्यास आम्हाला रेल्वेचे प्रवासी म्हणून जो हक्क मिळायला पाहिजे तो आपणाकडून मिळत नसेल तर आम्ही येत्या 11 नोव्हेंबरला छत्रपती शिवाजी महाराज टर्मिनल येथे सामूहिक आत्मदहन करणार असल्याचा इशारा पेणकरांच्या वतीने देण्यात आला आहे.
- मानव अधिकाराच्या माध्यमातून रेल्वे प्रवाशांना सोयी सुविधा उपलब्ध करून देणे हे रेल्वे प्रशासनाचे काम आहे, मात्र विविध निवेदने देऊन, रेल रोकोचा इशारा देऊन, आंदोलने करून आणि प्रशासनासोबत चर्चा करून देखील आम्हा पेणकरांना हक्काच्या मूलभूत सुविधा मिळत नसतील तर आम्ही दि.11 नोव्हेंबर रोजी सामूहिक आत्मदहन करण्यावर ठाम आहोत. – योगेश म्हात्रे, अध्यक्ष, मी पेणकर, आम्ही पेणकर समिती
- कोरोना काळात निर्माण झालेली आर्थिक परिस्थिती पाहता रेल्वे सेवा बंद असल्याने एसटीचे तिकीट आम्हाला परवडत नाही. त्यामुळे पेण मधील जवळपास 50 टक्के कामगार प्रवासी बाहेरगावी कामालाच जाणे बंद झाले आहेत. एसटीचा पेण-पनवेल दिवसाचा तिकीट 45 रुपये तर ट्रेनचा त्रैमासिक 370 रुपये असल्याने आम्हाला तो परवडतो, त्यामुळे रेल्वे प्रशासनाने ही शटल सेवा लवकरात लवकर सुरू करावी. – प्रशांत ठाकूर, अध्यक्ष, निस्वार्थी प्रवासी संघ