सुशांतच्या प्रथम स्मृतीदिनानिमित्त अंकिता लोखंडेने घरी केलं हवन
। मुंबई । प्रतिनिधी ।
अभिनेता सुशांतसिंह राजपूत याचा आज पहिला स्मृतीदिन. गेल्यावर्षी याच दिवशी,14 जून 2020 रोजी त्याने घरी गळफास लावून आत्महत्या केली. या बातमीने संपूर्ण मनोरंजन विश्‍वाला मोठा हादरा बसला होता. पवित्र रिश्ता या मालिकेतून अभिनयाच्या क्षेत्रात पदार्पण केलेल्या सुशांतचे हे असे अचानक जाणे सगळ्यांनाच चटका लावून गेले. विशेष करून त्याची पहिली गर्लफ्रेंड आणि ङ्गपवित्र रिश्ताफ मालिकेतील त्याची सहकलाकार अंकिता लोखंडे हिच्यासाठी तर हा मोठा धक्का होता. या दोघांचे ब्रेकअप झाल्यानंतरही त्यांच्या मनात एकमेकांबद्दल आदर होता. त्यातूनच अंकिताने सुशांतच्या पहिल्या स्मृतीदिनानिमित्त तिच्या घरी पूजा ठेवली होती.
अंंकिताने सुशांतच्या पहिल्या पुण्यतिथी निमित्ताने घरी होम- हवन केले. त्याचे काही फोटो तिने इन्स्टाग्राम स्टोरीवर शेअर केले आहेत. या फोटोंच्या बँकग्राऊंडला ओमचा मंत्र घोष ऐकू येत आहे. अर्थात या फोटोंमध्ये अंकिता कुठेही दिसत नाही. परंतु अंकिताच हा होम करत असावी, असा अंदाज व्यक्त केला जात आहे.
अंकिताने याआधीही सुशांतच्या आठवणी शेअर केल्या होत्या. काही दिवसांपूर्वी अंकिताने सोशल मीडियापासून दूर राहणार असल्याची पोस्ट शेअर केली होती. त्यानंतर तिला सोशल मीडियावर ट्रोल करण्यात आले होते. परंतु सुशांतच्या पहिल्या स्मृतीदिनाच्या एक दिवस आधी अंकिता पुन्हा एकदा सोशल मीडियावर सक्रीय झाली आहे. पूजेचे फोटो शेअर करण्याआधी तिने समुद्रकिनारी उभे असलेले स्वतःचे फोटो शेअर केले. या फोटोमध्ये ढगांनी भरून आलेलं आभाळ दिसत आहे. भरलेल्या आभाळाकडे पाहतानाचा अंकिताचा हा फोटो सध्या सोशल मीडियावर चर्चेचा विषय ठरला आहे.
अंकितानं हा फोटो शेअर करताना लिहिले आहे, अंतर किती आहे हे महत्त्वाचे नाही कारण शेवटी आपण सर्व एकाच आभाळाखाली उभे असतो. यातून अंकिताने सुशांतला खास मेसेज दिल्याचा अंदाज अनेक चाहते लावताना दिसत आहेत. दरम्यान, सुशांतच्या आकस्मिक निधनानंतर अंकिताने सांगितले होते की, आयुष्यामध्ये पराभूत होऊन जीवन संपवणारा सुशांत नव्हता. सुशांतच्या कुटुंबियांसोबतच अंकिताने देखील त्याच्या मृत्यूची सीबीआय चौकशी केली जावी अशी मागणी केली होती.