शेकाप दहीहंडी! गावदेवी गोंधळपाडा गोविंदा पथकाची स्वप्नपूर्ती

| अलिबाग | प्रतिनिधी |
तब्बल दोन वर्षानंतर साजर्‍या झालेल्या अलिबागमधील शेतकरी कामगार पक्ष, पुरोगामी युवक संघटना अलिबाग पुरस्कृत प्रशांत नाईक मित्रमंडळाच्या लाखमोलाच्या दहीहंडीला शुक्रवारी उदंड प्रतिसाद लाभला. गेली अनेक वर्ष अलिबागमधील मानाची, शेकाप आयोजित दहीहंडी फोडण्याचे स्वप्न यावर्षी गावदेवी गोंधळपाडा गोविंदा पथकाने पुर्ण केले. शेकापचे सरचिटणीस आ. जयंत पाटील यांच्या हस्ते त्यांना रोख रक्कम १ लाख ११ हजार १११ रुपये व मानाची गदा देऊन गौरविण्यात आले.

यावेळी माजी आ.पंडित पाटील, अलिबाग अर्बन बँकेच्या अध्यक्षा सुप्रिया पाटील, माजी जि.प.सदस्या भावना पाटील, माजी नगराध्यक्ष प्रशांत नाईक, रायगड बाजारचे अध्यक्ष नृपाल पाटील, माजी उपनगराध्यक्षा अ‍ॅड.मानसी म्हात्रे, ज्येष्ठ नेते कबन नाईक, शैला पाटील, अ‍ॅड.गौतम पाटील, नंदकुमार मयेकर आदी मान्यवर उपस्थित होते.

या दहीहंडी उत्सवासाठी 1 लाख 11 हजार 111 रुपये व चषक असे पहिले बक्षिस ठेवण्यात आले होते. ते फोडण्यासाठी अलिबाग तालुक्यातील अनेक गोविंदा आणि गोपिकांच्या पथकांनी प्रयत्न केले. संयोजकांच्यावतीने पाच थऱ लावून सलामी देणार्‍या पुरुष व महिला पथकांना 15 हजार रुपये बक्षीस म्हणून मान्यवरांच्या हस्ते देण्यात आले. याशिवाय आकर्षक चित्ररथ स्पर्धेसाठी प्रथम क्रमांक 10 हजार रुपये, द्वितीय 7 हजार, तृतीयसाठी 5 हजार रुपये अशी बक्षिसे मान्यवरांच्या हस्ते देण्यात आली.

ही स्पर्धा अलिबाग तालुकापुरतीच मर्यादित होती. तर दहीहंडी स्पर्धा अलिबाग तालुक्यापुरती मर्यादित ठेवण्यात आली होती.

गेली दोन वर्ष कोरोनामुळे सर्वच सण, उत्सवांवर निर्बंध आले होते. मात्र आता कोरोनाचा प्रादुर्भाव कमी झाला आहे. त्यामुळे संपुर्ण महाराष्ट्रात मोठ्या उत्साहात दहीहंडी साजरी होत आहे. अपुरी जागा असतानाही प्रशांत नाईक मित्रमंडळ व अलिबाग पुरोगामी युवक संघटनेने केलेले नियोजन कौतुकास्पद आहे. पुढिल वर्षी दहीहंडीनिमित्ताने दर्जेदार सांस्कृतिक कार्यक्रमही आयोजित करण्याचा मानस आहे.
– आ. जयंत पाटील, शेकाप