श्री शिवछत्रपती टेनिस क्रिकेट स्पर्धेत शिवगर्जना कळमजे संघास विजेतेपद

। माणगाव । प्रतिनिधी ।
माणगाव येथील श्री शिवछत्रपती ग्रामीण टेनिस क्रिकेट असोसिएशन यांच्या सौजन्याने जय हनुमान क्रिकेट क्लब गारळ यांनी रविवारी (दि.19) आयोजित केलेल्या मर्यादित षटकांच्या टेनिस ओव्हरआर्म क्रिकेट स्पर्धेत शिवगर्जना मित्रमंडळ कळमजे संघाने अंतिम सामन्यात हिंदवी स्वराज्य तळेगाव संघाचा पराभव करून प्रथम क्रमांकाचे रोख पारितोषिक 10 हजार रुपये व आकर्षक चषक पटकावला. सदर स्पर्धेत असोसिएशनचे 16 संघ उत्स्फूर्तपणे सहभागी झाले होते.
माणगाव तालुक्यातील जावळी येथील भव्य मैदानावर जय हनुमान क्रिकेट क्लब गारळ यांनी स्पर्धेचे चांगल्या पद्धतीने आयोजन केले होते. या स्पर्धेत द्वितीय क्रमांकाचे विजेते हिंदवी स्वराज्य क्रिकेट तळेगाव संघास रोख 7 हजार रुपये व आकर्षक चषक, तृतीय क्रमांकाचे विजेते केसीसी क्रिकेट क्लब जावळी संघास रोख 5 हजार रुपये व आकर्षक चषक, चतुर्थ क्रमांकाचे विजेते अमरजित क्रिकेट क्लब खरबाची वाड़ी संघास रोख 3 हजार रुपये व आकर्षक चषक देऊन उपस्थित मान्यवरांच्या हस्ते गौरविण्यात आले. तसेच वैयक्तिक पारितोषिकांमध्ये स्पर्धेतील उत्कृष्ट फलंदाज अंकित वाढवळ, उत्कृष्ट गोलंदाज साहिल धोंडगे, उत्कृष्ट क्षेत्ररक्षक देवराज राणे तर स्पर्धेतील सर्वोत्कृष्ट खेळाडू मालिकावीराचा बहुमान अमोल वाढवळ यांनी पटकावला. या सर्वांना उपस्थित मान्यवरांच्या हस्ते गौरविण्यात आले.