धक्कादायक! तरुण अभियंत्याचा निर्घृण खून

| पुणे | प्रतिनिधी |

पुण्यातील मांगडेवाडी परिसरात संगणक अभियंता सौरभ आठवले याचा मानलेल्या बहिणीच्या प्रेमप्रकरणातून सूड घेण्यासाठी निर्घृण हत्या करण्यात आली. या खूनामुळे संपूर्ण पुण्यात एकच खळबळ उडाली आहे. पीडित तरुणाचे नाव सौरभ स्वामी आठवले (25) असून, तो संगणक अभियंता होता.

मिळालेल्या माहितीनुसार, सौरभ हा आपल्या परिसरातील एका अल्पवयीन मुलीला बहीण मानत होता. तिच्या आयुष्याची काळजी घेणारा, तिला योग्य मार्गावर ठेवणारा सौरभ याला त्या मुलीच्या प्रेमसंबंधांची माहिती मिळाली. हे प्रेमसंबंध तीने तिच्या घरच्यांपासून लपवले होते. सौरभने बहिणीची जबाबदारी म्हणून तिच्या घरच्यांना हे सत्य सांगितले. परंतु, या सत्याचा परिणाम वेगळाच झाला. यामुळे तिच्या अल्पवयीन प्रियकरच्या डोक्यात तिडीक गेली. आणि त्याने संतापाने माझं नातं उघडं केलं याची किंमत तुला चुकवावीच लागेल अशी धमकी दिली. 18 ऑगस्टच्या रात्री सौरभ आपल्या घरातून बाहेर पडला. त्यानंतर तो परतलाच नाही. दुसऱ्या दिवशी घरच्यांनी भारती विद्यापीठ पोलीस ठाण्यात बेपत्ता झाल्याची तक्रार दिली. दरम्यान, राजगड पोलिसांना शिंदेवाडी गावच्या डोंगरात एका अज्ञात तरुणाचा मृतदेह आढळल्याची माहिती मिळाली. सौरभचा मृतदेह पाहून पोलिसांनाही धक्का बसला.

हत्येचा मागोवा घेत पोलिसांना उलगडा झाला की अल्पवयीन प्रियकराने सूडातून हत्येचाचा कट रचला होता. त्याने आपल्या तीन मित्रांना श्रीमंत गुज्जे (21) वडगाव मावळ, संगम क्षीरसागर (19) वडगाव मावळ आणि नितीन शिंदे (18) पुणे, मूळ रा. लातूर यांना सोबत घेतले. या चौघांनी मिळून सौरभला घराखाली बोलावले, जबरदस्तीने गाडीवर बसवले आणि दुर्गम डोंगरावर नेले. तिथे निर्घृणपणे धारदार हत्यारांनी सौरभवर हल्ला चढवून त्याला जीवे मारले. या हत्येप्रकरणी राजगड पोलिसांनी तांत्रिक पुरावे, सीसीटीव्ही आणि गुप्त माहितीच्या आधारे आरोपींना ताब्यात घेतले. या गुन्ह्यात वापरण्यात आलेले ॲक्टिव्हा, स्प्लेंडर मोटरसायकल, मोबाईल फोन व हत्यारे जप्त करण्यात आली. तसेच भोर न्यायालयाने आरोपींना 28 ऑगस्टपर्यंत पोलिस कोठडी सुनावली आहे. या घटनेचा अधिक तपास राजगड पोलिस करीत आहेत.