धक्कादायक! 18 वर्षीय लेकीनेच केली आईची हत्या

| पुणे | वृत्तसंस्था |

18 वर्षीय तरुणीने मित्राच्या मदतीने स्वतःच्या आईच्याच डोक्यात हातोड्याचे घाव घालून खून केल्याचा प्रकार उघडकीस आला आहे. चंदननगर पोलीस स्टेशनच्या हद्दीतील वडगाव शेरीत हा संपूर्ण प्रकार घडला. खून केल्यानंतर आई घरातील मोरीत घसरून पडल्याचा बनावही या तरुणी केला होता. मात्र पोलिसांच्या तपासात या तरुणीचं भिंग उघड पडलं. पोलिसांनी याप्रकरणी खुनाचा गुन्हा दाखल केला असून या तरुणीच्या मित्राला अटक केली आहे.

आई घरातील मोरीत पाय घसरून पडल्याने गंभीर जखमी झाल्याचा बनाव त्याने रचला होता. मात्र तिच्या नातेवाईकांना याबाबत शंका आल्याने त्यांनी पोलिसांकडे तक्रार दिली होती. त्यानुसार पोलिसांनी तपासाची चक्र फिरवली आणि हा संपूर्ण कट उघडकीस आला. पोलिसांनी दिलेल्या माहितीनुसार, योगिता ही मंगल गोखले यांची मुलगी आहे. तिने मित्र यश शितोळे यांच्या मदतीने आईच्या बँक खात्यातून पैसे काढले होते. पैसे काढण्याचे आईला समजले तर ती रागावेल अशी भीती तिला वाटत होती. यातून तिने आईचा खून करण्याचा कट रचला. तिने मित्राला घरी बोलावले. घरातील हातोडा त्याला दिला आणि झोपलेल्या आईच्या डोक्यात हातोड्याची घाव घालून खून करण्यात आला. यश शितोळे डोक्यात हातोडा मारत असताना योगिताने आईचे तोंड स्कार्फने दाबले होते. पोलिसांनी याप्रकरणी गुन्हा दाखल केला असून अधिक तपास सहाय्यक पोलीस निरीक्षक माने करत आहेत.

मंगल संजय गोखले (45, राजश्री कॉलनी वडगाव शेरी) असे खून झालेल्या महिलेचे नाव आहे. याप्रकरणी मयत महिलेची मुलगी योगिता संजय गोखले (18) आणि तिचा मित्र यश मिलिंद शितोळे (18, गणेशनगर वडगाव शेरी) या दोघांवर गुन्हा दाखल केला आहे. विनोद शाहू गाडे (42) यांनी याप्रकरणी तक्रार दिली.

माया, जिव्हाळा गेला कुठं?
आपल्याच आईच्या डोक्यात हातोडाघालून हत्या केल्याचा प्रकार समोर आल्यानंतर अनेक स्तरावरुन संताप व्यक्त केला जात आहे. या घटनेमुळे नात्यातील ओलावा, माया, जिव्हाळा उरला आहे की नाही, असा प्रश्न पुन्हा एकदा समोर आला आहे.