मुरूडमध्ये लाचखोर अभियंत्याचा खरा चेहरा उघड!

श्रद्धा बोऱ्हाडे एसीबीच्या जाळ्यात; अडीच लाखांची लाच घेताना रंगेहाथ पकडले

। रेवदंडा । प्रतिनिधी ।

मुरूड येथे सार्वजनिक बांधकाम विभागातील कनिष्ठ अभियंता श्रद्धा बोऱ्हाडे यांचा लाचखोर चेहरा आता उघड झाला आहे. ठेकेदाराकडून तीन लाखांची लाच मागितल्यानंतर तडजोडीने अडीच लाखांवर समाधान मानून ती रंगेहाथ पकडली गेली. अँटी-करप्शन ब्युरो (एसीबी) रायगड-अलिबागने केलेल्या सापळ्यात ही भ्रष्ट अधिकारी ताब्यात घेतली असून, तिच्या कारकिर्दीला मोठा धक्का बसला आहे.

सन 2024 मध्ये सार्वजनिक बांधकाम विभाग अलिबागकडून मुरूड-एकदरा-राजापुरी-खोकरी रोडवरील किमी 5/270 च्या बाजूचे स्लॅब ड्रेन कामाचा टेंडर मिळवलेल्या ठेकेदाराने काम पूर्ण केले. परंतु, फायनल बिल इस्टीमेट तयार करण्यासाठी सा.बां. उपविभाग मुरूडच्या कनिष्ठ अभियंता श्रद्धा बोऱ्हाडे यांनी तब्बल तीन लाखांची लाच मागितली. नाकारल्यावर तिने तडजोडीने अडीच लाखांवर शिक्कामोर्तब केले. याबाबत दि. 28 मार्च रोजी ठेकेदाराने एसीबी रायगड-अलिबागकडे तक्रार दाखल केली. एसीबीने तक्रारीची पडताळणी केली असता बोऱ्हाडे यांनी लाचेची मागणी आणि स्वीकृती मान्य केली. दि. 30 मार्च रोजी मुरूड येथील सार्वजनिक बांधकाम उपविभाग कार्यालयात सापळा रचला असता, बोऱ्हाडे यांनी ठेकेदाराकडून पंचांसमोर अडीच लाख रुपये रोख स्वीकारताना रंगेहाथ पकडल्या गेल्या. ही कारवाई पोलीस अधीक्षक शिवराज पाटील (एसीबी ठाणे), अपर पोलीस अधीक्षक भागवत सोनवणे व सुहास शिंदे (एसीबी ठाणे), पोलीस उपाधीक्षक सरिता भोसले (जेसीबी रायगड) यांच्या मार्गदर्शनाखाली पीआय निशांत धनवडे, पीआय नारायण सरोदे, विनोद जाधव, अरूण करकरे, महेश पाटील, सुमित पाटील, सचिन आटपाडकर, नवदीत नांदगांवकर, मोनिका मोरे (एसीबी रायगड-अलिबाग) यांनी यशस्वी केली. या प्रकरणाने सरकारी कार्यालयातील भ्रष्टाचाराची कळ येईल अशी शक्यता आहे.

या प्रकरणातून भ्रष्टाचाराच्या विरोधात एसीबी कठोर कारवाई करत असल्याचे स्पष्ट झाले आहे. एसीबीकडून नागरिकांना आवाहन करण्यात आले आहे की, लाच मागणाऱ्या लोकसेवकांबाबत माहिती असल्यास तात्काळ संपर्क साधावा.