स्नेहल जगताप-कामत यांचा गावभेट दौरा

पोलादपूरच्या दोन प्रमुख कार्यकर्त्यांचा पक्ष प्रवेशाचे संकेत

। पोलादपूर । प्रतिनिधी ।

महाड विधानसभा मतदार संघाच्या महाविकास आघाडीतील शिवसेना उध्दव बाळासाहेब ठाकरे पक्षाच्या अधिकृत उमेदवार स्नेहल जगताप कामत यांचा शनिवारी (दि.26) पोलादपूर तालुक्यातील गावभेट दौरा जाहीर झाला आहे. दरम्यान, पोलादपूर तालुक्यातील दोन महत्वाचे कार्यकर्ते या दौर्‍यामध्ये शिवसेना उध्दव बाळासाहेब ठाकरे पक्षामध्ये जाहिर प्रवेश करणार असल्याचे संकेत दिले, जात असल्याने तालुक्यातील सर्वपक्षीयांमध्ये प्रचंड उत्सुकता निर्माण झाली आहे.

महाड विधानसभा मतदार संघातील प्रचारासाठी गेल्या काही दिवसांपासून रणनिती ठरविण्याचे काम पोलादपूर तालुक्यातील महाविकास आघाडीतील शिवसेना उध्दव बाळासाहेब ठाकरे पक्षाच्या कार्यकर्त्यांनी सुरू केले आहे. यावेळी लोकसभा निवडणुकीप्रमाणे जरादेखील गाफीलपणा होऊ न देण्याची सतर्कता बाळगण्यात येत असल्याची माहिती पद्माकर मोरे यांनी दिली. पोलादपूर येथील श्रीसाईनाथ महाराज मंदिराजवळील तालुका संपर्क कार्यालयामध्ये बुधवारी झालेल्या प्रमुख पदाधिकारी व कार्यकर्त्यांच्या बैठकीवेळी येत्या शनिवारी होणार्‍या पोलादपूर तालुक्यातील गावभेटीच्या कार्यक्रमाचे नियोजन करण्यात आल्यानंतर प्रसिध्दी माध्यमांना ही माहिती देण्यात आली.

शनिवारी 12 वाजता लहुळसे, 12.30 वाजता करंजे आदिवासीवाडी, 1.30 वाजता करंजे, 2 वाजता देवळे, 3 वाजता दाभिळ, 3.30 वाजता रानकडसरी बावळी, 4.30 वाजता नाणेघोळ, 5 वाजता केवनाळे, 5.30 वाजता नाणेघोळ आदिवासी वाडी असा स्नेहल जगताप कामत यांच्या दौर्‍याचा कार्यक्रम जाहीर झाला आहे. या दौर्‍यामध्ये पोलादपूर तालुक्यातील दोन खंदे कार्यकर्ते शिवसेना उध्दव बाळासाहेब ठाकरे पक्षामध्ये जाहीर प्रवेश करणार असल्याची चर्चा सोशल मिडीयाद्वारे व्हायरल होत असून संपूर्ण तालुक्यात या फटाक्याच्या आवाजाची प्रतीक्षा आणि उत्कंठा वाढली आहे.